FIFA U17 World Cup khelhna tur khawpui puan a ni

India-in kum 2017-ah FIFA U17 World Cup a thleng dawn a, FIFA Local Organizing Committee-te chuan World Cup khelhna tur hmun an puang chiang ta.

World Cup thleng tur hian Goa, Kerala, New Delhi, Mumbai, Kolkata leh Guwahati te chu thlan an ni a, heng khawpui leh state thlanchhuah paruk te hian rokhawlhna leh buaina an nei a nih chuan Bengaluru, Pune leh Chennai khawpuiah te hian nghah thei tura ruahman a ni bawk.

FIFA Local Organi­zing Committee (LOC) Tournament Director Javier Ceppi chuan, "FIFA U17 World Cup thlenna tur hmun paruk chu puan chian a ni tawh a, kan thlanchhuah khawpui leh state te hian an thlen theih dawn leh dawn loh Spetember 2016 hma ngeiin min hriattir a ngai dawn a ni," a ti.

Goa tan hmasawnna

India rama football atchilhna hmun Goa-in FIFA U17 World Cup thleng tura thlan an ni hi an hlawkpui dawn. Vasco, Benaulim leh Cuncolim-a football ground-te chu international standard-a training tlakna tura ruahman tura tih a ni a, hemi pual hian cheng vaibelchhe 15 ruahman a ni. Goa hi September 2016-a khelh ṭan tur AFC U16 thlengtu tur zingah pawh telh an ni.

Goa sports minister Ramesh Tawadka chuan, "U17 World Cup leh U16 AFC Championship kan thleng thei tur hi kan lawm takzet a, infiamna leh tourism lama thil ropui tak a nih avangin Goa tan tun hi fiahna hmachhawn hun ṭha ber chu a ni. Kum thum chhung rim taka kan hnawthawh rah kan seng mek a, India football tan chuan hmasawnna ropui tak a ni. Thlawpna ṭha tak hmuh kan inbeisei a, World Cup hlawhtling tak thlen kan tum dawn a ni," a ti.

World Cup behbawm

FIFA lamin U17 World Cup khelhna tur hmun hi an duh tui khawp a, World Cup khelhna tur hmunte tana zawm ngei ngei tur point 8,532 lai an tarlang.

Heng point sangriat chuang an tarlan zing­ah hian FIFA-in ngaih­pawimawh lehzual an la nei cheu a, chu chu training ground leh stadium a ni.

World Cup thlengtu tur khawpuite hian trai­ning ground ṭha tak flood­light hnuaia train theihna tur pali tal an nei tur a ni a, stadium changtlung tak, dressing room pali tal leh inkhelhna pitch fai tak an neih ngei ngei a ngai bawk.

Ceppi chuan U17 World Cup thleng thei ngei tura inbuatsaih chu khawpui an thlan­chhuahte kutah a innghah tawh thu a sawi.

U17 World Cup thleng tura thlanchhuahte hi group match ruk tal a tlem berah thleng ṭheuh tura beisei an ni. Team 16 an inlan anga, tournament chhung hian match 52 khelh tur a awm ang.

World Cup thlengtu turte hi Knock-out match an thlen dan tur hrilh hriat an la ni lo a, group stage match an thlen dan a zirin match pawimawh thlen tir tum an ni.

Sum keng hnem tournament

FIFA U17 World Cup hi age level tournament mah nise India tana sum a rawn ken tel zat tur hi a tam dawn hle.

World Cup khelhna tur hmun state ṭheuhte chu World Cup chhimtu khualzin vangin US dollar maktaduai 10 ṭheuh tala an state sum lak luh pun belh tura beisei a ni a, India ram pumpuiin a hlawkpuina tura beisei zat hi dollar maktaduai 260 lai a ni.