Tualchhung Transfer Aizawl FC-in player langsar 3 la lut

Season thara I League khel tur Aizawl FC-in tualchhung foot­ball-a player langsar Lalruatthara, H. Lal­muan­kima leh Ronald Zothanzama te an la lut.

Europe lam ang tho­in tualchhung bazar-ah club-te'n player an inchuh nasa hle. MPL3 champion Aizawl FC transfer chanchin hi player-ah a tawp lo a, I League kai puitu coach K. Malsawmkima hma lam hun a chiang lo.

Luangmual FC coach hlui Mala hian I League-a Aizawl FC enkawl chhunzawm turin AFC A-License a nei lo a, MPL3 champion team-ah hian a cham zel ang em tih hi ngaihtuah tham a tling.

Player thar chu

Defender ṭha Ruat­thara leh winger MK-a te hian nikum season khan Chanmari FC chu MPL3 final an thlen pui a, Santosh Trophy-ah Mizoram tan an feh­chhuak bawk.

Ronald hi Dinthar tlarhnung innghahna a ni a, MPL hmasa bera Dinthar champion-na kawngah tha a thawh hnem hle.

Aizawl FC-in tlar hnung­ah MPL best pla­yer Lalramchullova, Lalrozama, Immanuel HS Lalṭhazuala, Thomas Lalengkima, Lalṭhakima te bakah Nigerian defen­der Emma te an kawl a; transfer hunlaia tlar hnung an siksawi dan tur hi a ngaihnawm chho ang.

Aizawl FC technical director Hmingthansanga chuan, "I League club kan nih vangin player lak a awl phah lo a, a pawimawh ber chu sum a ni. Chutihrualin kan player lak duh ang chu kan hmin thei zel a, tunah hian player pahnih tihfel mai theih kan nei a. A rang lamin kan puanzar ang. Player lak ṭeuh kan tum lo a, squad ti chak thei chauh kan la dawn," tiin a sawi.