Ricciardo a nghing em ni?

Formula 1 team Red Bull driver Daniel Ricciardo chuan season tharah an team a chhuahsan dawn tih chu thu chiang a la nih loh thu a sawi. Hetihrual hian Ricciardo hian engpawh thleng thei a nih thu a sawi lang tel bawk.

Kum 25-a upa driver hian Red Bull-ah hian kum 2018 thleng contract a nei mek a, mahse nak­kumah chuan Ferrari car a khalh tawh dawn tia sawi a tam hle.

Tun season Formula 1 con­struction championship a pahnih­na dimhmun luah mektu Ferrari hian an driver pakhat zawk Kimi Raikkonen hi an duhkhawp ta lo deuh niin a lang. Season thara Ferrari car a la khalh chhunzawm duh a nih chuan hmasawn turin Raikkonen hi an lo hrilh tawh hial.

Sebastian Vettel-a team-mate Raikkonen hian tun season intlansiak vawi riat awm tawh aṭangin point 72 hlawhchhuak tawhin driver standings-ah palina a ni pha mek. Vettel a phak lohna hi point 48 lai a ni tawh.

Hetiang boruak a nih avang hian Ferrari chuan tun season a point 36 hmu mek tu Ricciardo hi an driver pakhat zawk thlak nan hian an thlithlai mek niin an sawi.

Australian racing driver chuan, "Contract nei reng chung si a team dang nena sawizawm hi ka la ni ngai lo. Amaherawhchu thil hi kan rindan loh deuh pawh hian a thleng ve thut ṭhin," tiin a hmalam hun a chain loh thu a sawi lang zauh.

Sawi chhunzawmin Ri­cciar­do chuan, "Tuna pawimawh ber zawk chu kan car engine hi Renault hian kan duhthusam min pe thei se chu team dangte el phak turin kan ṭha ve tawk. Intlansiak lo awm leh tur atan ṭha taka inbuatsaih hi ka tih tur hmasa chu a ni," tiin a sawi bawk. Formula 1 a season khat a hmannaah nikum khan Ricciardo hian point 238 hmuin pathumna a ni nghe nghe.