Hmeichhe World Cup US hmeichhiain final an lut

Hmeichhe World Cup-ah USA-in an chungnun zia an lantir chhunzawm a, nimin zing khan vawi hnih champion lo ni tawh Germany chu 2-0 a hnehin a vawi li nan Hmeichhe World Cup final an lut.

Germany-in hmahruaina hun ṭha an neih an chhawr ṭangkai zo lo a, chak lo zawkah an ṭan phah. First half-ah goal a lut lo a, second half ṭan aṭanga minute 58 naah Germany-in penalty an hlawhchhuak.

Tournament neih lai meka goal ruk khung tawh Germany striker Celia Sasic a lo pen chhuak a, hun ṭha bawhpelhin a pet out.

USA-in an vanneih an chhawr chhunzawm a, Germany-in penalty an hlawhchhuah aṭanga minute 10 naah penalty an hlawhchhuak ve leh a, an chesual ve duh lo. USA tan captain Carli Lloyd-i'n penalty hi goal-ah chan tirin 1-0 in USA-in hma an hruai.

Inkhel boruak a ṭang a, Germany-in an siphurh sut ngei an tum. Mahse, tournament khelh lai meka goal khung hnem ber team Germany-in goal khat chiah la chhuah USA tlarhnung an paltlang thei lo.

Hun tawp nan minute ruk chiah a awm tawh a, USA tan substitute Kelley O'Hara a rawn inlar. Ram tana a goal khung hmasak ber khungin Hara hian USA goal-ah a volley lut.

Goal hnih sut turin Germany tan hun a tam tawk tawh lo a, Hmeichhe World Cup semifinal aṭangin an tla.

USA hian vawiina England leh Japan inkhela chak zawk zawk final-ah an hmachhawn ang.