Osaka a inhnukdawk

US Open champion Naomi Osaka chu a malpui hliam a la dam fel thei lo a, tun thla tawpa khelh tur French Open-ah a inlan thei dawn lo. Paris khawpuia a inkhelh loh tur thu hi a tichiang tawh.

Japanese star hian kar hmasa lawk khan Victoria Azarenka hnehin US Open nomawi a chawi. New York khawpuiah hian a malpui a hliam a, hliam nei chungin inelna lian a hmachhawn - a malpui hliam hi tuamin a inkhel erawh a khaihlak phah lutuk lem lo.

Kum 22 mi Osaka chuan, "Ka malpui hliam a la dam fel lo, clay season hmang turin inbuatsaihna ka nei hman lo a ni. Ka tan chuan Italian Open leh French Open hi a inhnaihchilh lutuk," tiin a inhnuhdawh thu a sawi.

World number 3 Osaka hian Roland Garros-ah hian third round a la paltlang ngai lo, a inkhelh thiamna hmun a nih loh avangin harsa tak chunga inkhelh luih kha a tum lem lo niin a ngaih theih bawk.

French Open-ah hian world number 1 leh champion lai ni bawk Ashleigh Barty pawh a inlan dawn lo. Australian nula hian coronavirus vangin US Open pawh kha a khel lo, Paris khawpuia a kal loh chhan pawh hri leng vang tho a ni.