Leicester-in manager Nigel Pearson an ban

Premier League khel zel tura Leicester City chhanhimtu manager Nigel Pearson chu club nena an inkar ṭhat loh vangin ban a ni.

2014-15 season-ah kum 51-a upa Pearson hian Foxes hi Premier League-ah 14-na a nih pui a, amaherawhchu hming hliauna tur a ngah hle. Pearson hian journalist pakhat chu ostrich tiin a ko a, Crystal Palace midfielder James McArthur nen buaina an nei bawk.

Leicester City chuan, "Nigel Pearson leh club te inkarah ngaihdan inan lohna lian tak a awm a, chuvangin kan chhuah tir a ngai ta ni. Kan club tana Nigel-a hnathawh hi a ropui a ni. Ṭum hnih kan hneha a awm chhunga a hnathawh avang hian a chungah kan lawm takzet a ni," tiin thuchhuah an siam.

Pearson hian June 2008 khan Leicester hi a vawi khatna atan a enkawl a, kum hnih hnuah Hull City lamah a kalsan hnuin November 2011 aṭang khan a ṭum hnih nan Foxes hi a enkawl ṭan.

June thla khan Leicester player pathum chu Thailand an tlawh ṭuma mawi lo taka hotel-a an chet avangin an ban tawh a, ban zingah hian Pearson-a fapa James Pearson a tel nghe nghe. Pearson hi a fapa chet mawi loh avangin club chairman Vichai Srivaddhanaprabha-a'n a banah ngaih a ni.

Pearson hian April khan manager of the month chawimawina a dawng a, season paltlang dan erawh a harsa ve hle.

Journalist leh Palace player laka a chetmawi loh zawh khan Pearson hi ban se boruak a nei lian lo ang. Amaherawhchu Premier League tawp lamah Leicester result ṭha tak a neih pui a, season ṭan dawn hnaiha an ban thut avangin sawi zui a hlawh hle.

Newcastle striker hlui Alan Shearer chuan, "Club in enkawl dan hi chu a mak khawp mai. Thil theih loh tih puitu pawh ban a ni," tiin Leicester thutlukna chu a dem hle.

Liverpool legend Jamie Carragher chuan, "Hetiang vang hi alawm. Tunlai player-te hi chuan inkhelh chawlhsan hnuah club enkawl aiin football expert-a ṭhut an duhna chhan," tiin a sawi. Carragher hi Sky Sports hnuaiah a thawk mek.