Usain Bolt a inhnukdawk

Sprinter ngaihven hlawh Usain Bolt chuan thla leha neih tur Diamond League-ah a tel theih loh tur thu a puang. A ṭhal bawr na vangin Bolt hi Paris leh Lausanne-ah kan hmu thei dawn lo a ni.

Olympic gold medal paruk dawng tawh tu hi 100m, 200m leh 4x100m relay-ah te tel tura beisei ni mah se 100%-a a fit theih dawn loh avangin a inlan lo ang. August thla a neih tur World Athletics Championships-ah erawh a hmel kan hmuh theih ngei a beiseiawm. Tunah hian Bolt hi German khawpui Munich-ah Dr. Muller Wohlfahrt-a'n a enkawl mek a ni.

Kum 28-a upa Bolt chuan, "Paris leh Lausanne-ah ka intlansiak thei lo tur hi pawi ka ti takzet. He lai hmuna intlansiak hi a nawm tehlul nen mah se ka taksa hriselna ka ngaihpawimawh a ṭul hmasa a ni. Tunah chuan 100% a dam leh turin ka inenkawl mek a, ṭha takin ka lo kir leh theih ngei ka beisei," tiin a sawi.

Tun season-ah Bolt hi a che ṭha lo hle a, a tlan ṭhat berah pawh 100m chu second 10.12 chhunga thlen bakah 200m chu second 20.13 chhungin a thleng bawk. Heng pahnihah te hian Justin Gatlin leh Tyson Gay a tluk lo a ni.