Milan leh Muntari an in ṭhaṭhen

Italian club AC Milan chuan Ghana midfielder Sulley Muntari chu an club-ah season khat dang cham turin contract la nei mah se inbiakremna in an chhuah zalen.

Kum 30-a upa midfiuelder hian kum 2012 khan Milan hi a nghetin a zawm a, a ngheta a zawm hma hian loan-in Inter Milan aṭangin Rossoneri tan hian a lo khel tawh a ni.

Tun hnaia insiamṭhat tum mek Milan thuchhuak chuan, "AC Milan leh Sulley Muntari te chuan inhriatthiam tawnnain in ṭha ṭhen mai ṭha kan ti a, vawiin aṭang hian Muntari hi chhuah zalen a ni. AC Milan chuan kan club tan a theihtawp a chhuah ṭhin avangin Muntari hnenah lawmthu a sawi a, a hmalam hun atan kan duhsakna sang ber kan hlan a ni," tiin an puang.

Inter tan a khelh laia Champions League nomawi pawh lo chawi tawh Muntari hi Milan boss hlui ni ta Filippo Inzaghi hnuaiah a tlaltlum lo hle a, season hman zawh tak Serie A-ah khan match 16 chiah a inlan. May thla khan Palermo khelmuala an zin dawn ṭumin chawlh hahdam a dil a, kha ta ṭang khan Milan-ah hian a nghet lo ṭan a ni.

Muntari hian a nungchang vangin buaina a lo tawk zeuh zeuh tawh a, nikum World Cup Brazil-a khelhah khan a awmdan mawi lo avangin Ghana team camp aṭangin thawn haw a ni a, hemi hnu hian ram tan a inlan leh tawh lo.