Wimbledon Roger Federer leh Nadal te set hloh loin chak

Thawhlehni zan khan Roger Federer leh Rafael Nadal te chuan Wimbledon first round-ah set hloh loin an khingpui ve ve an hneh. Hmeichhe champion lai Petra Kvitova chuan second round a lut bawk.

Thawhlehni khan England-ah nidang aiin khua a lum hle a, kumina a lum ni ber tawngin 40C vel lai a ni. Khawlum tak hnuaiah vawi sarih champion tawh Federer hian minute 67 chhung lekin Damir Dzumhur chu 6-1, 6-3, 6-4 in a hneh a ni.

Court One-a inkhelah kum 29-a upa Nadal chuan harsatna a tawk bik lo a, a khingpui Thomaz Bellucci chu straight set 6-4, 6-2, 6-3 in a hneh bawk.

Spanish seeded 10 na Nadal chuan, "Khawvela hmun nuam ber pakhatah kan inkhel a, kum dang ngaihtuah chuan kumin khaw awm dan chu a nuam hle. Set hloh loa hnehna ka chang thei hi ka lawm hle," a ti. Nikum khan Nadal hi fourth round-ah Nick Kyrigos hneh loin a tla a ni.

Anmahni ram leilungah ngei Andy Murray chuan tournament bul a ṭan chhe lem lo a, second round lut turin Centre Court-ah Mikhail Kukushkin chu darkar hnih leh minute 13 chhungin 6-4, 7-6, 6-4 in a hneh.

English player-te hi anmahni ramah hian an che ṭha ngai vak lo a, kum 2006 hnuah kumin hi tennis star mipa paliin Wimbledon second round an luh lehna chiah a ni. Britain number 1 Murray hma hian Liam Broady, Aljaz Bedene leh James Ward te chuan second round an lo luh tawh bakah hmeichhe lamah Heather Watson chuan first round a paltlang bawk.

Inkhel dangah seeded 13 na Jo-Wilfried Tsonga chuan second round lut turin hna hautak a hmachhawn nghal. Inkhel inhnehtawk takah Gilles Muller chu 7-6, 6-7, 6-4, 3-6, 6-2 in a hneh hram a ni.

Nikum hmeichhe finalist te

Hmeichhe lamah champion lai Petra Kvitova chuan a lallukhum humhim turin tournament bul a ṭan chhe hran lo. Czech seeded pahnihna hian a match hmasa berah Kiki Bertens chu 6-1, 6-0 in a hneh. Second round lut turin Kvitova hian Centre court-a inkhelah hian minute 35 chiah a mamawh a ni.

Thawhlehni zan hmeichhe inkhelah hian rin loh takin nikum runner-up seeded 12 na Eugenie Bouchard chu Ying-Ying Duan lakah 7-6, 6-4 in a tlawm. Chinese Duan hian seeded pawh a chan phak loh bakah qualifying khelin kumin Wimbledon hi a khel ve hram chauh a ni.

Mipui mit fukna ber tur zing ami, nikum French Open finalist Simona Halep chu a match hmasa berah a tla nghal bawk. Kum 23-a upa Halep hi World number 106 na Jana Cepelova lakah 5-7, 6-4, 6-3 in a chak lo a ni.

Nikum French Open final-a Maria Sharapova hneh lo tu Halep chuan, "Ka tan chuan hriatthiam a harsa ngei mai. Ka match hmasa berah ka chak lo nghal ang tih hi chu ka ring bik lo asin le. Mahse a lo thleng miau si," tiin second round a lut zo lo chu na a ti hle.