Copa America Argentina tak tak kan hmu ta

Khawvel attacking palyer ṭha rual awmkhawmna Argentina chuan an zia tak tak an chhuah ta. Nilaini zing khan Copa America final lut turin Estadio Municipal Alcaldesa Ester Roa Rebolledo-ah Paraguay 6-1 in an sawp.

An game hmasa pali aṭangin goal li chiah an thun avangin Argentina manager Gerardo Martino-a'n sawisel a hlawh. Amah sawiseltute ka hup nan kum 2007 hnua a vawi khat nan Copa America-ah Argentina final a thlenpui.

Ram pahnihte hi an group match hmasa berah inkhel tawhin Argentina-in goal hnih faia hma an hruai hnuah Paraguay hian an sut leh. Tun ṭumah erawh Martino-a naute an chungnung chiang ta hle.

Kum 1993 hnu lama la champion leh miah lo Argentina hian an record duhawm lo tak thai bo turin Pathianni zing khian he tournamnet thlengtu Chile hneh an tum leh ang.

Inkhel chu

Barcelona super star Lionel Messi-a'n goal khung lo mah se he inkhelah hian a langsar ber. Manchester United defender Marcos Rojo leh PSG winger Javier Pastore te chuan Messi thawhrah sengin first half-ah goal an khung. Paraguay tan striker Lucas Barrios chuan goal khat a khung ve bawk.

Second half-ah pawh Argentina captain Messi 'show' kan hmuh chhun­zawm leh, counter attack hmang ṭang­kaiin player tlan chak Angel di Maria chuan an goal thumna leh goal li na a khung zui.

Hemi hnu hian Manchester City striker Sergio Aguero chuan defender pathum kar aṭanga a tauh goal bakah amah thlaktu Gonzalo Higuain chuan an goal rukna a khung bawk.

He inkhel a goal hnih khungtu Di Maria hian club lama a pu Louis van Gaal a ti lawm ngeiin a rinawm a, City striker Aguero pawh innghahna tlak a ni tih kan hmu nawn leh ta.

Ram tan Messi a ṭha tawk

Ram tan a khel ṭha tawk lo tiin sawisel hlawh ṭhin mah se Messi-a'n theihna leh thiamna a takin a lantir. Semifinal-ah hian goal khung turin tlar hma berah awm lo mah se Argentina goal nawr zawng zawng hi Messi aṭanga chhuak a ni deuh vek.

Kum 28-a upa forward hian a ṭhiante goal khung tur vawi thum siamsakin goal hnih dang pawh hi ama thawhrah a ni. Kumin Copa America-ah hian ani lo chu match khata ṭhiante goal thun tur vawi thum siamsak thei dang an la awm lo.

Ram tan match 102 a khelh

aṭanga goal 46 khung thei tu Messi hian Diego Maradona aiin an ram tan hian goal 12 in a khung tam tawh zawk. Amaherawhchu nomawi ala chawi pui lo thung. Tun ṭumah hian Messi hian an ramah Copa America nomawi hi a hawn thei a nih ngat chuan khawvelin an theihnghilh tawh ngai lo ang.

Eng nge an sawi?

Messi chuan an khelh ṭhat thu sawiin , "Goal ka khung loh vangin ka lawm lo hran lo a, kan team-in ṭha takin kan khelh vangin ka lawm zawk. Kan tactic kan thlak hran lo a, kan vanneih ni chuan hetiang ti thei tur hi chu kan ni reng a ni. Inelna ala zo lo a, hahchawlh sawi hman ala ni lo. Champion ngei turin kan bei zui ang," tiin a sawi. He inkhelah hian Messi hi 'man of the match' a ni nghe nghe.

Paraguay head coach Ramon Diaz chuan, "Ka naute khelh danah ka lawm tho mai. Keni aia player ṭha leh chungnung zawk kan khelh avangin a harsa a ni. Nakinah chuan tournament hi kan la thlir kir anga, hmasawnna tam tak kan chhar a ni tih chu ka hmu ngei ang," a ti. Diaz hian a star player pahnih Derlis Gonzalez leh Roque Santa Cruz te chu inhliam vangin minute 30 hmain a lak chhuak.