FIFA buaina Blatter thlaktu tur an duhtui

Premier League chief executive Richard Scudamore chuan presi­dent atana Sepp Blatter thlaktu tur chu corporate lam mi leh sulhnu ropui tak nei ni se a duh thu a sawi chhuak.

FIFA hi president Blatter-a'n a hna a chawlh­san tur thu a puan hnuin Decmber thla khian president thar thlang tura beisei an ni a, hetiang boruak karah hian Scudamore chuan Blatter thlaktu tura a duhthusam a lo sawichhuak a ni.

Scudamore chuan, "Tlang taka sawi chuan mi thar hlak ngaihtuahna thar nena rawn penchhuak thei tur kan mamawh. Thil inthlak danglam kan mamawh thu kan sawi reng a, tun hi kan beisei ṭhin danglamna thlen hun chu a ni," a ti.

US court leh Swiss Court ten FIFA an chhui mek avangin president ṭanglai Blatter chuan a hna aṭanga a inhuhdawh thu June 2 khan a sawi a, a hnu lawkah FIFA president aṭanga a ban loh thu sawi lehin president thar thlanna neih hunah pawh chuh leh tho a tum nia sawi a ni.

Thomson Corpo­ration-a Senior Vice President hna chelh ṭhin Scudamore chuan sumdawnna lama mi inhmang mi FIFA president atan a duh thu sawiin, "Ka ngaihdan chuan football politician aiin corporate khawvela sulhnu lo nei lian tawh takin FIFA hi hruai se ka duh. Football politician-in an chuh ve chuan vote bak thil dang ngaihtuah an nei ngai lo," a ti.

Kum 55-a upa Scuda­more chuan FIFA hruai turin a English pui a duh loh thu a sawi bawk.