Sergio Ramos a chhuak lo ang - Ferdinand

Manchester United defender hlui Rio Ferdinand thlir dan chuan Real Madird defender Sergio Ramos-a'n Manchester United emaw Man City emaw a zawm dawn lo.

Ferdinand chuan, "Sergio Ramos-a'n Man City a pan dawn? A hma lawkin United pan turin an ziak a, tunah City pan turin an ziak leh tawh. Ramos agent hian a hna ṭha takin a thawk a, club hausa tak pahnih thiam takin a dawr a ni. Amaherawhchu ka ngaihdan chuan season tharah hian Raphael Varane emaw Pepe nen emaw nen an inkawp ang. Varane dang pakhat an awm leh a nih loh chuan Ramos hi a chhuak lo ang," tiin Ramos chungchang a sawi.

Kum 36-a upa England defender hlui chuan, "An pawisa chhiar zat hi kum 29-a upa, hralh lehna tur awm tawh lo tan chuan a to lutuk a ni. Chutiang bawkin United aia City a thlan zawkna chhan tur ka hre lo. Ramos-a'n England a pan theih dan tur hi kei chuan ka hriatthiam ve lo," tiin a ngaihdan tlang takin a sawi.

Khawvel defender manto ber ni tawh Ferdinand-a ngaihdan hi Ramos-a nu Paqui Garcia ngaihdan chiah a ni.

Spain TV channel pakhat Chiringuito zawhna chhangin Paqui chuan, "Madrid a awm zel hi a duh a ni. Spain hi nuam a ti a, a chhuah ka ring lo," tiin a sawi.

Real Madrid-a Ramos lungawi loh chhan ber chu hlawh chungchang a ni a, Spanish defender hian Real chhuahsan aiin a hlawh duh ang zat an pek theih nan Manchester khaw club pahnih chhaih buaiah a ngaih theih.

Barcelona defender Dani Alves khan contract thar a ziak duh lawk lo a, Manchester United-in an dawr hnuah Catalan club-in contract duhawm tak an zawrh a, Brazilian defender chet dan leh Spanish defender khawsak mek dan hi inang khata ngaitu an tam hle.