Bayern-in Costa an la lut

Bundesliga champion Bayern Munich chuan Shakhtar Donetsk aṭangin pound maktaduai 21.3-in Brazilian midfielder Douglas Costa an la lut.

Tunge Costa?

Douglas Costa de Souza hi September 14, 1990 khan Sapucaia do Sul, Brazil-ah a piang. Feet nga leh inches sarih chauha sang midfielder hi Gremio aṭangin a lar chhuak a, January 2010 khan Shakhtar a zawm.

Shakhtar manager Mircea Lucescu chuan Douglas Costa hi wing-ah a chhawr a, a ṭul dan a zirin ding leh vei lamah a dah ṭhin. Ukraine club tan hian match 203 khelin goal 38 a khung.

Costa hian Shakhtar hi nikum khan league-ah pahnihna a nih pui a, hemi hma hian a zawnin league-ah vawi nga a champion pui a, Cup-ah vawi thum a champion pui bawk.

Kum 24-a upa mid­fielder hian Brazil tan vawi kua a inlan tawh a, goal khat a khung tawh. 2015 Copa America quarterfinal-a Brazil-in Paraguay an hneh loh ṭumin penalty a hlah.

Lak luh chhan

Bayern hian wing-ah Arjen Robben leh Franck Ribery te an nei a, nikum khan inhliam vangin Dutch leh French winger te hi an chhawr mumal thei lo.

Spanish manager Pep Guardiola chuan winger an mamawhna a hrechiang a, squad ti chak turin Costa hi a la lut ta a ni.