Professional huang chhungah Indian boxer Vijender Singh

Indian boxer zinga huhang ngah ber pawl Vijender Singh chuan amateur boxing chhuah­sanin professional huang chhung a luhchilh ve dawn ta.

Kum 2008 Beijing Olympic bronze medallist hian IOS Sports & Enter­tainment kaltlangin Queens­berry Promotions hnuaiah contract a ziak a, a contract rei zawng hi hun rei tak chhung atan tih bak tarlan a ni lo.

Kum 29-a upa middle­weight boxer hian pro­fessional huangchhung a luhchilhna kum khat chhungin mi paruk a inhnek pui dawn a ni.

IOS Sports & Enter­tainment CEO Neerav Tomar chuan, "Vawiin hi India boxing tan chuan hriat­reng tawh tur leh chhinchhiah tlak a ni. Vijen­der hi inhnek thiam tak leh a aia ṭha zawk beisei chunga bei ṭauh ṭauh ṭhin mi a ni a, mi tluklehdingawn khat chuangte rinna hi amahah a innghat a ni," tiin Vijender Singh chu boxing lama India beiseina a nih thu a sawi.

Kum 2009-a middleweight world number one ni thei Vijender Singh chuan, "Pro­fessional boxer ka ni ve ta mai tur hian min ti hlim takzet a, ka hmalam huna thil lo thleng turte hmachhawn ka chak tawh a ni. Ka duh ber chu thawkrim zawka beih zela kan ram tih hmingṭhat hi a ni a, boxing record duhawm tak neih ka duh a ni," a ti.

Vijender-a contract ziah­na Queensberry hian professional boxer 40 chuang an lo enkawl tawh a, heng zinga 20 hi champion kawnghren hreng thei khawpin an hlawhtling. An boxer thawhpui tawh langsar zingah Mike Tyson, Amir Khan leh Ricky Hatton te pawh an tel nghe nghe.

India-in mipa amateur boxer a neih tawh zinga ṭha ber ang hiala an sawi ṭhin Vijender hian 2006 leh 2014 te khan Commonwealth Games-ah India tan silver medal a lo dawng tawh a, 2010 Asian Games-ah gold medal a la bawk.

Haryana lam chhuak Vijender hian 2006 Asian Games, 2008 Beijing Olympic, 2009 World Amateur Championship leh 2010 Commonwealth Games-ah te bronze medal a la bawk a, Beijing Olympic-a bronze-a lak hi India-in Olympic boxing-a medal a lak hmasak ber a ni.

A contract thara sum tam tham tak hlawh tur Vijender hi Manchester khawpuiah inbengbelin British boxing legend Ricky Hatton te pawh lo train tawhtu Lee Beard hnuaiah training a nei dawn a ni.