Clyne-a'n Liverpool a zawm

Liverpool chuan Sou­thampton aṭangin defender Nathaniel Clyne chu pound maktaduai 12.5 sengin an la lut. England right-back hian kum nga chhung cham turin Anfield-ah hian contract a ziak a ni.

Reds hian pound maktaduai 10-a Clyne lakluh theih inbeiseiin Saints hi an lo dawr hlawhchham tawh a, pawisa tam zawk nen an hlawhtling ta a ni.

Kum 24-a upa English defender chuan Liverpool a zawm thei chu a lawmthu sawiin, "Ka hlimin ka lawm em em a, Liverpool te ang club ropui tana ka khel tur hi duhthusam thleng dik ang mai a ni," a ti.

English defender ṭhang duang tak chuan Liverpool zawm tura a inngaihtuah buai loh thu sawiin, "Liverpool-in min duh tih ka hriat rual khan ka hlim em em a, engkim kha tluang takin kal se tih kha ka duh tawp mai a ni," tiin a phur hle.

Season hman zawh taka beisei phak lo Liver­pool-in hmasawn an tum tih a lang a, Clyne an lak­luh hma hian forward Roberto Firmino leh Danny Ings, midfielder James Milner, defender Joe Gomez leh keeper Adam Bogdan te an lo la lut tawh.

Crystal Palace-a bul ṭantu Clyne chuan, "Liver­pool manager Rod­gers-a'n a hnuaia khel turin min duh a, he hmun­ah hian mimal tak pawhin hma ka sawn theih ka beisei a, ka theihna tak tak lantirna hun ṭha tak hawnsakin ka awm a ni," tiin Liverpool-ah a theihna tak tak a pholan theih a beisei thu a sawi.