Manchester United inkhelh hun a inher chhuak ta

Zanin dar 10:00-ah Manchester United-in Old Trafford-ah Crystal Palace an mikhual dawn. Ole Gunnar Solskjaer-a hote hian Premier League-ah pathumna niin season an khar a, Europa League semifinal an thleng a, bul an ṭan fuh phawt chuan Liverpool leh Manchester City te nena an inkar an ti zim thei ang.

United hi nipui chawlh laia thawm nei ngah ber an ni a, an thawm neih dan erawh a duhawm vek lo. Jadon Sancho nen hun rei tak sawi zawm an ni a, tun thlengin an la lo. Captain Harry Maguire-a'n nipui chawlh a hmanna Greece-ah buaina a tawk a, thubuai a neih bakah England tan a inlan loh phah.

Gareth Southgate-a'n rawlthar duhawm Mason Greenwood-a'n England kawr hak tir mah se Iceland ram hotel-a nula an tawmpui vangin an thawn haw. Manchester United hian chanchin ṭha lam aiin chhe lam an ngah a, season ṭan hauh hmain Solskjaer-a'n chinfel tur a ngah ta hle.

Manchester United-in Sir Alex Ferguson hnuah manager nghet pali David Moyes, Louis van Gaal, Jose Mourinho leh Solskjaer te an nei tawh a, Norwegian manager chiah hi Scottish manager hnuaia khel tawh a awm.

Premier League history-a manager hlawhtling ber Sir Alex hian kalphung nghet a nei a, khelmuala pawna a player-te'n buaina an neiin a chhan ṭhin. Solskjaer pawhin nimin tlai press conference-ah a pu hnung zuiin a naute a rawn chhan chat.

Solskjaer chuan, "Mason Greenwood nen kan inbia a, kan inbiak dan erawh sawi chhuah a rem lo. Season ṭha tak a hmang zo chiah a, hetiang tur hian kei leh club kan thawkrim hle. Khelhna hun kan pe tam a, chuvangin chawlh a mamawh tih hi kan ngaihdan a ni. 

"Keini chuan kan theihna zawnah kan chhan dawn a, ka pui zel ang. Kan bulah a awm a, kan tih ṭhin dan pangngai a rawn tih chuan ngai a awh leh ang," tiin khelmual pawnah Greenwood mualpho mah se a hnunga an din tlat tur thu a sawi.

Entawn tlak tur bera ngaih captain Harry Maguire pawh chhan a ngai. England defender hi Greek thliarkar pakhat Syros-a chawlh an hman laiin buainaah an inhnamhnawih a, thuneitute khawih leh thamna pek tuma puh an ni.

United boss Solskjaer chuan, "Harry hi ka hrechiang a, a rilru pawh a pau khauh hle. Tuna a buaina hi a kal chho zel dawn a, ngaiah a nei thei mai ang. A buaina tam zawk hi chu dan lam hre mite buaipui tur a ni a, Harry erawhin khelmual chauh ngaihtuah tum dawn. Ka mimal ngaihdanah chuan football chauh a ngaihtuah theih hi ka ring a, mipui thlirna chu engpawh ni se training-naah a ti ṭha hle," tiin a sawi.

Crystal Palace an hmachhawn hunah Harry Maguire-a'n tlarhnung a ho dawn tih a hriat theih a, Greenwood pawh squad-ah a tel dawn. United hian khelmual pawna an buaina chingfel tur chuan khelmual chhungah chet ṭhat a ṭul. 

June 30, 1998 khan England leh Argentina te FIFA World Cup-a an inhmachhawn ṭumin David Beckham-a'n red card a hmu a, Greenwood an sawiselna let feiin sawiselna a dawng. 

Beckham-a'n season bul ṭanna inkhelah goal khungin amah sawiseltute a ngawihtir a, United-in season tawpah nomawi lian pathum Champions League, Premier League leh FA Cup te an chawi bawk.

Manchester United-in season liam taa Premier League-a keeper ṭha pahnih David de Gea leh Dean Henderson te an kawl a, Solskjaer-a'n a thlan tur zawk a la sawi lo. 

English keeper Henderson hian contract a pawtsei a, Norwegian manager hian Manchester United number 1 ni thei tur a tih avangin bench-ah a dah ringawt a rinawm loh. Chutihrualin Solskjaer vek hian De Gea hi khawvel keeper ṭha berah a chhal tih hriat a ṭha. 

United boss Solskjaer chuan, "Crystal Palace hmachhawn tur ka hrilh dawn lo che u. Amaherawhchu goalkeeper training a hmuhnawm takzet a, training-naah kan duhthusam ang kan hmu," tiin a sawi. De Gea hi Spain tana a feh chhuahnaah Germany leh Ukraine te hmachhawnin a che ṭha ve a, Henderson erawh England tana koh ni mah se a inlan lo.

Manchester United hian Aston Villa nen friendly match an khel tawh a, Henderson-a'n bul ṭanin Ollie Watkins-a'n Villa tana a khung avangin 1-0 in an chak lo.

 

Manchester United-in nipui transfer-a player langsar an lakluh chu Donny van de Beek chiah a ni a, Villa nen friendly match an khelh ṭumin a inlan. Solskjaer chuan, "Molde ka enkawl laiin Ajax tan kan lamah a khung. Hetih lai hian a la naupan deuh avangin amah hi kan lo zir chiang tawk lo.

"Amaherawhchu a huaisen avang te, a tlan thiam avang tein ka mit a la hle. United-ah hian midfield aṭanga goal tam zawk khung hi ka duh a, chumi tur atan chuan kan lalut," tiin an player thar chungchang a sawi.

Solskjaer chuan, "Aston Villa lakah a khel ṭha a, kan hmuh ngei pawh a rinawm. First eleven tur ka la sawi dawn lo a, training zawhah a chiang chauh dawn," tiin a sawi. 

United tana chanchin lawmawm chu Paul Pogba leh Luke Shaw te Palace hmachhawn turin an dam tawh a, midfield-ah Pogba, Fernandes leh Van de Beek te an awm thei dawn. Chutihrualin midfield laia khel turin Scott McTominay, Fred leh Nemanja Matic te an la awm bawk.

Manchester United hi Ole Gunnar Solskjaer-a kaihhruaina hnuaiah pathumna an ni a, season tharah Champions League an khel dawn. United hi an ṭhenawm club Man City nen indawt chiahin awm mah se an inkarah point 15 zet a awm a, tih zim a hautak dawn. Norwegian manager Solskjaer-a'n nomawi chuh pha turin player lak belh an mamawh thu a sawi tawh a, club hnenah a player mamawh a thlen tawh bawk.

Solskjaer-a'n nipui transfer-a lakluh a duh ber chu Jadon Sancho a ni a, tun transfer hunah hi chuan an lak aiin an lak loh a rinawm ta zawk. Real Madrid duo Gareth Bale leh Sergio Reguilon te hming pawh an sawi ri a, Tottenham an chuh hneh lo. 

Sir Alex Ferguson-a'n Spurs duhlai Michael Carrick leh Dimitar Berbatov an chhuhsak ang ngawt kha  ni ta lo. United hian Donny van de Beek lalut mah se transfer-a an chet dan thlirin Man City leh Liverpool elpha tur niin an lang lo.

United boss Solskjaer chuan, "Min ṭantute chuan Man United ṭha ber an duh ṭhin. Kum 10 hma lam emaw kum 20 hma lam thlir kir ila, player ṭha ber kan kawl ṭhin. Sir Alex-a chhuah hnuah pangana bawr velah kan awm a, season liam taa pathumna kan ni pawh kha hmasawnna nasa tak a ni. 

"Bruno kan lalut a, Harry pawh kan captain a ni a, Aaron Wan Bissaka pawh a khel ṭha a, inringtawk takin season bul kan ṭan thei ang. Chutihrualin player thar lak belh tumin hma kan la zel," tiin transfer-ah beisei tur a la awm thu a sawi.