Pirlo leh Ronaldo ten hna an ṭan dawn

Player a nih lai kan thlirkir a nih chuan Andrea Pirlo thiamzia chu hai rual a ni lo, team enkawl lamah erawh naupang thil zir tir mai a la ni, a zinkawng bul a ṭan ve dawn chauh. Pathianni zan dar 12:30 hian Pirlo enkawl Juve chuan Sampdoria an mikhual ang.

Italian Serie A 2020-21 season chu zanin aṭangin khelh ṭan a ni dawn, match hmasa ber atan dar 9:30-ah Fiorentina leh Torino an inkhel dawn. Season hmasa pahnihna Inter Milan erawh tun kar tawpah an la inlan ve dawn lo.

Serie A coach ni tur chuan UEFA Pro licence neih a ngai, tun hnai mai khan Pirlo chuan a nei ve chiah. A thesis chu 'My Football' tih a ni a, Italian Football Federation (FIGC) lamin an tarlan dan chuan mark hmuh theih 110 aṭangin 107 a hmu.

Nilaini khan Pirlo-a licence neih hi a fel chauh, a la tharlam vet vet hle - league khelh ṭan hma ni thum chauh awm tawhah a nihna tur ang a thleng ve chauh tihna a ni. 2006 khan Gareth Southgate chu UEFA Pro license a neih fel hmain Middlesbrough enkawl phalsak a lo ni tawh.

July thla khan Juventus Under 23 team enkawl tura ruat a ni a, mahse senior team manager Maurizio Sarri an ban leh tak si avangin Pirlo hi a kaisang nghal. Junior team pawh a enkawl hman chuang lo, ni kua a liam chauh tihin senior team coach atan an ruat zui.

Pep Guardiola-a'n player a nih laia a khelhna Barcelona chu hlawhtling takin a enkawl chhunzawm thei. Zinedine Zidane pawhin Pep ang bawkin Real Madrid-ah thawnthu ngaihnawm a ziak mek a, a ziak chhunzawm reng bawk.

Juventus pawhin Pep leh Zidane ang turin Pirlo hi an beisei, an dinhmun erawh khaikhin chi a ni rih lo. Pep leh Zidane te hi chuan senior team an enkawl hmain junior team an kaihruai hmasa tawh a, chumi hnuah inelna sang an hmachhawn chauh.

Italy tana Pirlo khelhpui ṭhin Fabio Cannavaro chuan, "Guardiola leh Zidane chuan tawnhriat nei sain team an enkawl. Pirlo hi player a nih lai chuan inkhelh dan hrilh nawn a ngai lo, tunah erawh player hrang hrang hnathawh dan tur a hrilh tawh dawn," tiin a boruak a danglam tur thu 

a sawi.

Zindane-a'n hlawhtling taka Real Madrid a enkawl theih chhan lian tak chu Cristiano Ronaldo a nei kha a ni. Tunah chuan Ronaldo hi Pirlo tan a khel dawn, Portuguese forward hi kum 35 mi ni tawh mah se season hmasa khan league goal 33 a la khung thei tih hriat a pawimawh.

Real Madrid tana a hlawhtlinna ang kha Turin khawpuiah Ronaldo hian a la chhawm tawk lo. Manager chhuak ta Sarri khan team a kaihruai ṭha tawk loa ngaih a ni a, amah thlaktu hian engtiang takin nge Ronaldo hi a rawn chhawr dawn tih chu hriat a ni thuai ang.

"Juventus a nih chuan hnehna chan hi thil pangngai a ni," tiin Turin club ropuizia an sawi ṭhin. Old Lady hian a zawna a vawi 10 nan Serie A title lak an tum dawn a, season 25 chhung an nghah tawh Champions League nomawi pawh Pirlo leh Ronaldo hoa chawi an tum dawn.

Andrea Pirlo hian a match hmasa bera a hmachhawn tur thlang thei ni se chuan Sampdoria hi a thlang kher lo mai thei. Team vantlang zinga mi ni mah se Sampdoria hi coach tawnhriat nei ṭha Claudio Ranieri enkawl an ni.

Kum 68 mi Ranieri-a'n club hrang hrang a enkawl hnem tawh, match 952 zetah a team a kaihhruai tawh; Serie A bikah pawh vawi 423 a naute a enkawl tawh, tun ṭuma inhmachhawn tur Pirlo leh Ranieri ten tawnhriat an in neih hnem hleih hle.

Chutihrualin Pirlo-a'n player a nei ṭha zawk a, forward Paulo Dybala inhliam mah se Ronaldo a awm avangin lungngaihna tur a awm lo. Barcelona aṭanga an lakluh midfielder Arthur pawhin a club thar tana a match hmasa ber a khel thei tura ngaih a ni.