Celtics lakah Heat chak nawn

Point 17 zetin hniam zawk mah se Miami Heat chu huaisen takin an tho chhuak a, nimin zing Eastern Conference finals inkhelah Heat hian Boston Celtics 106-101 in an hneh a, series-ah 2-0 in hma an hruai.

Heat an chak nawn avangin Celtics tan lehthal a harsa tawh dawn, chutihrualin tlang tur chuan game li lak a ngaih avangin kawng a la inhawng zau viau tho. September 20, Pathianni zing dar 6:00-ah game 3 an khel ang.

The Arena, Florida-a inkhelah Heat tan Goran Dragic-a'n point 25 a hlawh chhuak a, a teammate Bam Adebayo chuan point 21 a neih zinga 15 zet chu quarter hnuhnung ber bika a neih niin an chak theih nana mi pawimawh a ni.

Heat forward Jimmy Butler chuan, "Kan bei-dawng ve ngai lo, mahni ṭheuh kan inringtawk hle a, keimahni bakah kan ṭhiante kan ring zo vek bawk," tiin a sawi a, pressure nei loin nuamti taka an inkhelh thu a sawi tel bawk.

Kum 2014 hnua a vawi khat nan Heat hian Eastern Conference finals an khel leh a, an khingpui Celtics erawh tun hnai season li chhunga an inlan vawi thumna a ni thung. Heat hian game 1-ah 117-114 in hnehna an lo chang tawh bawk a ni.

Western Conference finals chu tukin zing aṭang hian khelh ṭan a ni ve dawn chauh a, regular season bakah playoff lama kal fawr tak Los Angeles Lakers leh Denver Nuggets ten zing dar 6:30-ah game 1 an khel ang.