Champions League playoff Player kim lo Roma-in Porto an ngam lo
Thawhlehni zan khan Cham-pions League playoff second leg-ah player pahnih hnawhchhuah Roma chuan mikhual Porto 3-0 in an ngam lo a, Portuguese club khelmualah 1-1 a an inhnehtawk tawh bawk si avangin inkhel pahnih belhkhawmah 4-1 a chak loin season tharah Champions League an khel dawn lo.
Celtic boss Brendan Rod-gers-a'n rawih a nih chhan a ti hlawhtling a, kum thum hnua a vawi khat nan Scottish club hian Champions League an khel ve leh dawn ta - khualmualah Hapoel Beer Sheva chu 2-0 in hneh lo mah se Celtic Park-ah 5-2 a an lo hneh tawh avangin inkhel pahnih belhkhawmah 5-4 in an chak.
Roma van a duai
Stadio Olimpico-a Roma leh Porto inhmachhawn hmain mualneitu Roma chu dinhmun ṭha zawk an ni. Mahse, inkhelh ṭan aṭanga minute sarihna leka Porto defender Felipe-a'n goal hmahruai a khung hnuah Italian club an talbuai chhunzawm.
Roma player pawimawh Daniele de Rossi-a'n ṭul lo taka Porto defender Maxi Pereira a tlawh avangin minute 39-naah hnawhchhuah a ni a, Jesus Corona laka hlauhawm taka foul substitute Emerson Palmieri chu minute 50-naah hnawhchhuah chhunzawm a ni. Player pakua lek nichunga khel Roma tan thawhleh ngaihna a awm tawh lo a, defender Miguel Layun leh winger Coro-na ten Porto tan goal thun chhun-zawmin an chak chiang hle.
Porto tan season ruk chhung a zawna Champions League an khelhna tur a ni a, Roma chak loh hi season thum chhung a zawna Serie A pathumna club-in play off an paltlang theih lohna a ni thung - season tawp ruala football chawlhsan tur Francesco Totti-a'n a hun tawp lamah Champions League a khel dawn lo.
Celtic an ropui
Ronny Deila-a'n season hnih chhung a zawnin Scot-tish Premier League-ah Celtic champion pui mah se Champions League group stage an thlen theih loh avangin a hna aṭangin a bang a, Celtic-in Norwegian manager thlen phak loh an thlen theih beiseiin Liverpool boss hlui Rodgers an ruai a, Northern Irish manager hi a hlawhtling nghal.
Hapoel Beer Sheva-in Ben Sahar leh Ovidiu Hoban goal khung hmangin Celtic rumṭhaih mah se Scottish club an talbuai duh lo a, an khelmuala goal nga an khung tawh chhawr ṭangkaiin a group stage thleng zawkah an ṭang ta a ni. Celtic keeper Craig Gordon chuan an goal hmasa ber a chhuah hmain penalty a dang a, inkhel thlak danglamtu a ni - Celtic hian Champions League group stage an luh vang hian a tlem berah pound maktaduai 30 vel an lakluh beisei a ni.
Celtic boss Rodgers chuan, "Europe inelna lian berah kan kir leh dawn ta a, hei hi Celtic awmna tur chu a ni. Kan tum ber chu Champions League khelh a ni a, an thil tumah player-te an hlawhtlin avangin fak an phu a ni. Zanina kan hlawhtlinna hi club tan a ni satliah lo a, he ram, Scotland tan hian a ropui a ni," tiin an hlawhtlinna chu a chhuang hle.
Inkhel dang
Thawhlehni zan Champions League play off inkhel dang-ah Monaco chuan hun tawp dawna Fabinho penalty hmangin Villarreal chu 1-0 in an hneh a, inkhel hmasa nena belhkhawmah 3-1 a hnehna changin Champions League an khel dawn.
Dundalk chuan Irish club zinga Champions League khel hmasa ber nih an tumna chu an hlawhtlinpui thei lo a, Polish club Legia Warsaw nen 1-1 a inhnehtawkin 3-1 aggregate in an tlawm. Bulgarian club Ludogorets pawhin Champions League-a inlan turin Czech champion Viktoria Plzen chu inkhel pahnih belhkhawmah 4-2 in an hneh bawk.