US Open a hnai

Kumina Grand Slam tournament hnuhnung ber tur US Open chu Thawh-
ṭanni aṭangin khelh ṭan a ni leh tawh dawn. Kumin hi vawi 136 an neihna tur chiah niin tun dinhmunah chuan mipa leh hmeichhe player langsar inlan thei lo tur an awm rih lo.

Hetih lai hian Grand Slam vawi 17 champion tawh Roger Federer erawh-in Wimbledon zawh hnu khan a tan season a tawp thu a lo sawi tawh thung a - Swiss thiampuipa hi season tharah bak kan hmu tawh rih lo ang.

Thawhlehni khan inelna buatsaihtu lam chuan seeded chang phak mipa leh hmeichhe singles player 32 ve ve hming an tarchhuak a, champion lai Novak Djokovic leh world number 1 Serena Williams te chu a chung berah an awm.

Kuminah hian ṭum dang ang lo takin hmei-chhe champion lai kan hmu dawn lo! Flavia Pennetta chuan nikum khan singles nomawi a chawi zawh hnu lawkah a tan Grand Slam hnuhnung ber a nih tur thu a sawi.

Kum 33-a upa Pen-netta hian major title a lak hmasak hnu lawkah, "US Open khelh hma thla khat liam taah khan he inelna hi ka tan a hnuhnung ber a ni tiin thutlukna ka lo siam tawh," tiin nikum khan a lo sawi tawh a ni.

Mipa leh hmeichhe tan wildcard paruk ve ve siam a ni a, mipa lamah Rio Olympic singles silver medalist Juan Martin del Potro leh Australia tlangval James Duckworth te chu a ram leilung fa ni lo zinga wildcard dawng thei an ni. Hmeichhe lamah Ellen Perez (Australia) leh Virginie Razzano (France) te tan hmun buatsaih sak an ni bawk.

Kuminah hian mipa leh hmeichhe doubles inelna a awm leh dawn bawk a, champion lai Sania Mirza leh Martina Hingis te ṭangdun ṭhin an inṭhen tawh avangin an inlan a nih pawhin kawppui dang nen a ni tawh dawn.