Sindhu leh Malik hlawhtlinna lamtluang

"Rim taka thawh rah chu a thluma, a tui bik em em a ni," tia an lo sawi tawh ṭhin angin India tana Rio Olympic-a medal latu pahnih Pusarla Venkata Sindhu leh Sakshi Malik te hian hlawhtlina chang tur hian kawng harsa leh khirhkhan tam tak an paltlang a, an thawk rim hle bawk; a tawpa a rah lo lang chhuak chu khawvel hmuha India ti mawitu a ni a - an tan malsawmna a ni bawk.

Hyderabad shuttler Sindhu hian hmeichhe badminton final-ah world number 1 Carolina Marin chu darkar khat leh minute 23 zet an inkhelh hnuah hneh lo mah se India hmeichhe zinga Olympic silver medal dawng hmasa ber a ni tho. Wrestler Sakshi Malik pawhin infiamna bung thar kaiin India hmeichhe zinga Olympic medal dawng hmasa ber ni turin Aisuluu Tynybekova a hneh a - 58 kg category-ah bronze a dawng.

Racket phenah chuan...

Kum 21-a upa Sindhu hi a naupan lai aṭanga infiamna ngaina mi a ni a, kum riat mi chauh a nih lai aṭangin coach Pullela Gopichand kaihhruaina hnuaiah badminton a zir ṭan der tawh. Olympic medal a dawn theih nan hian kum 12 chhung zet chu rim takin a inzir a, taksa sawi zawi bakah ei leh in tur thlengin uluk taka buatsaih sak ṭhin a ni.

India shuttler zinga All England Open Badminton Championship champion thei pahnihna Gopichand kaihhruaina hnuaiah Sindhu hian zing dar 4:00 - 7:00 thleng practice a nei ṭhin a, chhunah inzir chhun zawmin court chhung bakah hian nitin push-up vawi 100 leh sit-up vawi 200 a ti ṭhin. He mai hi a la ni lo, a fitness a ṭhat leh zual nan 2.4 km vela a thui a tlan ṭhin bawk.

Gopichand chuan, "A tlangpui thuin nitin badminton atana hun a hman hi darkar ruk aṭanga sarih vel a tling ang," tiin a sawi. Heng bakah hian physio Kiran Challagundla kaihhruaina hnuaiah a hrilselna a ṭhat zawk theih nan uluk enkawl a ni a. World Championship-a bronze medal vawi hnih lo dawng tawh Sindhu hi thla hnih danah a thisen endik ṭhin a ni nghe nghe.

Kum 42-a upa Gopichand hian India rama badmintion hmasawn theih nan a thawh hlawk hle a, kum 2001 khan Hyderabad-ah Gopichand Badminton Academy dinin hei hi India tana hnuhma ropui inṭanna pakhat chu a ni.

India tana London Olympic-a bronze medal lo la tawhtu Saina Nehwal bakah Parupalli Kashyap, Srikanth Kidambi, Arundhati Pantawane, Gurusai Datt, Arun Vishnu leh Sindhu te hi he hmun aṭanga inzir chhuak an ni.

Gopi chuan Sindhu lakah hei aia sang zawk a la beisei thu sawi zuiin, "Tunah hian kum 21-a upa chauh a la ni a, a hmaah hlawhtlinna dang a la awm zel ka beisei. Tunah hian khawvela a ṭha ber ni thei tura inzir mek a la ni a, a lakah hian beiseina sang tak ka nei," a ti. Coach hian a player chuan YOGA a ngaihsan loh thu leh a tih ngai loh thu a sawi tel bawk.

Thingtlang nula

US president Barack Obama chuan, "Khawi hmuna awm pawh ni la hlawh-tling tur chuan eng mahin a dal thei lo che," tiin Rio Olympic hawnna neih hnuah khan Twitter-ah a lo tarlang tawh. He thu tidiktu chu Haryana state chhunga thingtlang khaw pakhat, chhungkaw 2044 (2011 census) vel chauh awmna 'Rohtak' a piang Sakshi Malik hi a ni ngei ang.

Kum 23-a upa Sakshi hi a puitlin hnua infiamna lama lut chauh a ni bik lo. Kum 12 mi chauh a nih laiin coach Ishwar Dahiya kahhruaina hnuaiah wrestling a luhchilh tawh a, a nu leh pa ten infiamna an tuipui avangin chhungkaw lam aṭangin dodalna a tawng hran lo a, a pu Badhlu Ram pawh wrestler a ni nghe nghe.

Inchai a luhchilh hnua a hlawhtlinna langsar hmasa ber chu 2010 Junior World Championship kha niin bronze medal a dawng. Rio-a a kal hma hian 2012 Commonwealth Games (silver), 2015 Asian Championships (bronze) leh 2013 Commonwealth Championship (bronze) ah te hlawhtlinna a lo chang tawh bawk.

Sakshi hi mi beidawng hma mi chu ni se Olympic bronze medal dawng lo ang. 58 kg freestyle quarterfinal-ah Russian nula Valeria Koblova a hneh lo a, pathumna an inchuh ṭumin a khingpui Kyrgyzstan wrestler Aisuluu Tynybekova lakah 5-0 ngawtin a hniam zawkah a ṭang!

Amaherawhchu, "Wrestling-ah chuan second khat chhung lekin thil a danglam vek thei," tih thu lo sawi tawhtu Sakshi hian beidawng duh loin a bei let a, 5-5 as nih rual pui hnuah minute khat pawh a awm tling tawh lo, second tlemte chauh a awm tawh tihin a khingpuinu a kherh bet a, point 3 hmuh blehin hnehna a chang zui a ni.

Rio Olympic-a medal an dawn hnua an dawn

PV Sindhu

Thil pek Petu

Vbc 5 leh ram(2000 Square) Telangana Sorkar

Vbc 3, Hna(Group A), ram(2000 Square) Andhra Pradesh Sorkar

Vbc 2 Delhi sorkar

Nuai 75, Deputy Sports Manager Bharat Petroleum Corporation

Nuai 50 Haryana Sorkar

Nuai 50 Madhya Pradesh Sorkar

Nuai 50 Ministry of Youth Affairs and Sports

Nuai 50 Badminton Association of India

Nuai 50 NRI businessman, Mukkattu Sebastian

Nuai 30 Indian Olympic Association

Nuai 5 All India Football Federation

BMW car (Vbc 2 man) Hyderabad District Badminton Association

Nuai 1.01 Salman Khan

Sakshi Malik

Thil pek Petu

Vbc 5 leh Hna (Gazetted officer) Indian Railways

Nuai 60 Railway Ministry

Nuai 20 Indian Olympics Association

Nuai 20 Sports Ministry's Special Awards Scheme

Nuai 1.01 Salman Khan

*An thilpek dawn zinga a langsar chauh tarlan a ni.