Indian football a buai tulh tulh FIFA-in AIFF hnenah lehkha a thawn

All India Football Federation chuan kum 2017 aṭanga Indian Super League chu India rama league sang ber nihtir a tumna kawngah buaina a tawh belh zel a, football khawvela thuneitu sang ber FIFA chuan AIFF hnenah lehkhathawnin football hmasawnna tura ke an penna kawngah anmahni rawn ve zel tawh turin an hriattir.

AIFF ruahman dan chuan kum 2017 aṭangin ISL hi India rama league sang ber a ni ang a, a hnuai chiahah League One awmin tuna I League club ni mekte chu League One-a khel tura tih niin ISL-a tel an duh a nih chuan sum hmangin an 'hmun' an lei a ngai dawn.

Club lungawi lo

AIFF-in India football kalpui a tum dan hi hre lawkin Bharat FC, Royal Wahingdoh leh Pune FC-te chu I League aṭang hian an lo inhnukdawk tawh a, I League khelh chu sum sen thlawnna satliahah an ngai.

Rin lawk ang ngeiin ISL chu India rama league sang ber a nih tur thu AIFF-in an puang a, hun rei tak chhung I League lo khel tawh Sporting Clube de Goa leh Salgaocar F.C ten season tharah I League an khelh loh tur thu an puang nghal.

Second division champion Dempo SC chuan I League an khelh dawn leh dawn loh an la chian loh thu sawiin ISL-a I League club telh vek an duh a, Shillong Lajong neitupa leh AIFF vice president ni bawk Larsing Ming chuan ISL-a I League club tel vek a duh thu a sawi ve bawk.

I League club zingah East Bengal, Mohun Bagan leh Bengaluru FC-te chu ISL-ah hian tel nghal tura ngaih an ni a, I League club lian pathumte hian thawm an la nei hran lo.

Lehkhathawn chu

Hun rei tak chhung Indian football tana sum lo seng tawh Sporting Goa-in an lungawi lohna India rama phun lungawi pui mai an tum lo a, khawvela football thuneitu sang ber FIFA hnenah lehkha thawnin AIFF hmalakna chu Indian football tana thil pawi tak a nih theih thu an ziak. I League club lungawi lo zinga mi Mumbai FC chuan Asian Football Confederation hnenah lehkha an thawn bawk.

FIFA lamin lehkhathawn satliahah an ngai lo. Indian FA chu I League club hnen
aṭanga lehkhathawn an dawn thu an hrilh a, Indian club-te chuan AIFF-in India football a kalpui danah an lungawi loh thu an hrilh niin an ziak. FIFA chuan AIFF hnenah tuna an ruahmanna chu thutlukna tawp a nih leh nih loh an zawt a, tun hnuah football kalphung thlak danglam tura hma an la leh dawn a nih chuan an ngaihtuahnaah FIFA dah tel tawh turin an hriattir.

AFC leh AIFF inhmu

AIFF an buai tih hai rual a ni lo a, Thawhlehni khan AIFF leh Asian Football Confederation chu an inhmukhawm, sum lama AIFF puitu IMG-Reliance chu he meeting-ah hian an tel bawk. AFC headquarters, Kuala Lumpur, Malaysia-a inhmuhkhawmah hian Indian football-a league pathum (ISL, League One, League Two) siam tum chungchangah AIFF leh AFC chu thawk dun tura committee din an rawt.

He meeting-ah hian AIFF general secretary Kushal Das, I-League CEO Sunando Dhar, Reliance sports division CEO Sundar Raman, Football Sports Development Limited (FSDL) CEO Devang Bhimjyani, Re-liance Sports general manager Chirag Tanna-te chu Indian FA lam aṭangin an tel.

AFC general secretary Dato Windsor John chuan, "AFC chuan India ram football hi uluk takin kan thlithlai reng a, kan pawlin kan tum ber chu football hi Asia khawmualpuia infiamna langsar ber nihtir a ni. Chumi tur chuan India pawimawh zia kan hria a, AIFF thawhpui tur hian thutlukna kan siam ta a ni," a ti.

AIFF leh AFC-in thawhdun an tum a, I League club hotute chuan he thawhdunnaah hian tel ve an duh thu an sawi leh ta! I League club hotu, a hming tarlan loh chuan, "India rama football kalphung turah ngaihdan a phir mek a, hei vang hian kan ngaihdan in an lohna leh kan duhdan te kan sawi ve theih nan committee-a kan tel ve hi a ṭul a ni," a ti.

Court thubuai

Tun hnaiah India captain hlui Bhaskar Ganguly leh international hlui Manoranjan Bhattacharya te chu Supreme Court hnenah an zualko a, AIFF chuan dik lo taka sum an hman bakah Indian football chu kawng dik lo an zawhpui mek niin an sawi.

Chief Justice TS Thakur chuan, "Tuna AIFF kalphung hian BCCI chunga kan hmalakna ang kha an mamawh lo ang tih a sawi theih loh. Mahse, a pawimawh hmasa berah chuan High Court hnena zualko phawt turin Ganguly leh Manoranjan te ka hriattir a ni," a ti.

Supreme Court hian July, 2016 khan India rama cricket thuneitu sang ber BCCI chu an pawl kalphung thlak turin a hriattir tawh a, minister leh bureaucrat reng reng BCCI board-ah an awm ve a phal lo. Supreme Court sawi anga AIFF hi kalpui a nih dawn chuan AIFF president ni mek Rajya Sabha MP Praful Patel-a tan AIFF hruai zel a rem lo ang.