Nadal-a'n Brisbane-ah bul ṭan dawn

Grand Slam vawi 14 champion tawh Rafael Nadal chuan season thara a tournament khelh hmasa ber tur chu Brisbane International a nih thu a sawi.

ATP season-a a hmasa ber atan January thla hian Australian Open khelh ṭhin a ni, hemi hma hian inbuatsaih nan tournament dang an khel ṭhin. January thlatir hian Doha Open khelh tur a awm a, hetah hian Nadal a inlan lo ang - ATP 250 inelnaah bul a ṭan dawn zawk a ni.

Spain tlangval Nadal chuan, "Tuna kan dinhmun aṭanga thlirin season tharah chuan "Brisbane International-ah ka inlan theih ngei ka beisei, he hmuna inkhelh hi a nawm thu miin min hrilh fo tawh a, a takin tawn ka duh. Inkhelh
ṭan hma theih hi Grand Slam inbuatsaih nana duhthusam a ni," tiin a sawi.

Kum 30-a upa Nadal hi ban rek na vanga a chawlh reng hnuah Rio Olympic-ah khan lo kirin doubles-ah gold medal a dawng a, karleha khelh tur US Open-ah a inlan bawk ang.