Nishikori hnehtu Musetti

Italian Open khelh laiah rawlthar Lorenzo Musetti a hmuhnawm zel. Ningani zan inkhelah Musetti hian Kei Nishikori chu 6-3, 6-4 in a hneh a, clay court inelnaah hian last 16 a inhlangkai.

Kum 18 mi Musetti hian a match hmasa zawkah Grand Slam vawi thum champion tawh Stan Wawrinka a lo hneh tawh bawk a, beisei phak baka ṭhain inelna a hmachhawn - nizan khan Dominik Koepfer nen inhmachhawn lehin result kan hre hman lo.

Chak lo Nishikori tan erawh kawl a la êng thei rih lo. Japan tlangval hi US Open khelh tumin New York khawpuiah a zin a, coronavirus a kai avangin a inlan thei lo. Roma lamah beiseina sang tak nen zin lut mah se a match hnihnaah a chak lo nghal.

Hmeichhe singles lamah Victoria Azarenka a hmuhnawm nghal. US Open khel ṭha tak hi clay-ah pawh a hlauhawm tho, a khingpui seeded pathumna Sofia Kenin chu 6-0, 6-0 in a sawp.

Belarus star hian a match hmasa zawkah Venus Williams chu set hloh loin a lo hneh tawh bawk, world number 1 hlui hian Cincinatti Masters 2016 hnua a vawi khat nan nomawi chawi leh a beisei mek.