Europa League playoff West Ham mikhual tur Astra Giurgiu
Zanin dar 12:15 hian Premier League club West Ham chuan Europa League playoff second leg khel turin Romanian club Astra Giurgiu an lo mikhual ang, team pahnihte hi kar hmasa khan 1-1 in an lo inhnehtawk tawh.
First leg-ah khan Hammers tana Mark Noble penalty chhuih luh chu Astra tan hun tawp dawnah Denis Alibec-a'n a sut. Khualmualah goal an khung avangin Slaven Bilic naute tan group stage lut turin goal venhim a tawk ang.
West Ham hian tun season aṭangin London Stadium an luah ṭan a, an khelmual tharah hian match hnih khel tawhin Domzale 3-0 a an hneh bakah 1-0 in Bournemouth an hneh tawk bawk, hnehna an chan ve ve bakah goal an chhuah loh avangin zanin an mikhual tur hi an huphurh vakin a rinawm loh.
West Ham manager Bilic chuan, "Khelmual ṭha leh changtlung zawkah mikhual kan lo thleng dawn a, harsa lutuk loa hnehna kan chan theih ka beisei. Astra hi kan khelmuala kan hneh thei lo a nih chuan Europe-a inlan tlak kan ni lo tihna a ni mai," tiin a sawi.
First leg-ah khan Bilic hian Premier League ṭan nia Chelsea hneh lotu player pariat ngawt a siksawi a, player naupang rual luh tir chunga khuammuala an inhnehtawk pui theih lakah hnehna chan a inbeisei sang hle.
Hetihlai hian Astra hian sawi tur nei lo tawp an ni bik lo. Season hmasa khan club pahnihte hi Europa League third qualifying round-ah an lo inhmachhawn tawh a, hemi ṭum hian inkhel pahnih belhkhawmah Romanian club hi 4-3 in an chak.
Season hmasa a an intawn ṭum chuan Upton Park-ah first leg khelh niin West Ham hian 2-0 a hma an hruai hnuah goal hnih an chhuah leh a, second leg-ah Hammers defender James Collins hnawhchhuah niin 2-1 in an chak lo zui bawk - hei vang hian London club tan ngaihṭha taka lo mikhual ngawt a rem bik lo ang.
Hliam an tam
Striker palian Andy Carroll chu kar hmasaa an inkhelh ṭuma a hliam vangin kartawpa league match a Bournemouth an hneh ṭumin a inlan lo a, England international dinhmun a la chiang lo.
France star Dimitri Payet chu inlan thei tawh tura beisei a nih laiin hliam tuar dam hlim Manuel Lanzini bakah Sofiane Feghouli, Andre Ayew leh Aaron Cresswell te chu an inlan a nih pawhin duhthusam an ni hman kher lo ang.
Zanin Inkhel Tur
Time Home 1st Leg Away
10:00 PM Qarabag 0 - 1 IFK Göteborg
10:30 PM Brondby 0 - 3 Panathinaikos
10:30 PM Slovan Liberec 1 - 0 AEK Larnaca
10:30 PM Rosenborg 1 - 2 Austria Wien
10:30 PM Grasshopper 0 - 3 Fenerbahçe
11:00 PM Partizani Tirana 0 - 4 Krasnodar
11:30 PM BATE 0 - 2 Astana
11:30 PM Genk 2 - 2 Lokomotiva Zagreb
11:30 PM PAOK 3 - 0 Dinamo Tbilisi
11:30 PM Sparta Praha 0 - 0 SønderjyskE
11:30 PM AZ 3 - 0 Vojvodina
11:30 PM Anderlecht 3 - 0 Slavia Praha
11:30 PM Osmanlispor 1 - 0 Midtjylland
11:30 PM Shkendija 1 - 2 Gent
11:45 PM Maribor 1 - 3 Qabala
12:00 AM Crvena Zvezda 0 - 3 Sassuolo
12:00 AM Hajduk Split 1 - 2 Maccabi Tel Aviv
12:15 AM West Ham United 1 - 1 Astra
12:15 AM Saint-Étienne 2 - 1 Beitar Jerusalem
12:15 AM Olympiakos Piraeus 1 - 0 Arouca
12:30 AM Shakhtar Donetsk 2 - 1 Istanbul Basak
12:35 AM Rapid Wien 4 - 0 Trencín