Everton-in Deportivo striker an duh

Ronald Koeman enkawlna hnuaia insiamṭhat tum mek Everton chuan Deportivo La Coruna aṭangin pound maktaduai 15 man striker Lucas Perez Martinez chu lakluh tumin an hel mek.

Kum 27-a upa Lucas hian season hman zawh takah khan La Liga-ah goal 17 a khung a, Everton director of football Steve Walsh chuan hun rei tak chhung a lo thlithlai tawh niin an sawi.

Chelsea nena sawi-zawm hlawh striker Rome-lu Lukaku chuan manager Ronald Koeman hnenah Goodison Park-a cham a tum thu a hrilh tawh a, January-a pound maktaduai 13.5 a Everton zawmtu Oumar Niasse chu Merseyside club-ah hmalam hun a neih loh thu hrilh a ni tawh thung.

Toffees (Everton sawina) hian Manchester City-a tla tlum lo goal-keeper Joe Hart chu loan-a lak theih inbeisei mah se England international hlawh sang tak avangin an inngaihtuah buai mek. Kum 29-a upa keeper hian kar khatah £135,000 a hlawh a, loan fee nen season khat chhawr nan Everton hian pound mak-taduai 7 vel tal an sen a ngai ang.

Koeman chuan Sun-derland-a tui tawh lo central defender Lamine Kone chu lakluh tumin an hel bawk a, hliam vanga chawl mek Republic of Ireland defender Seamus Coleman thlak turin Southampton-a a enkawl ṭhin Cuco Martina chu a ngaihven bawk.