History keu letin Police an dawih zawk Mizoram Police Vs Chanmari FC
Vawiin tlai dar 2:00 - he hun hi Mizoram Police leh Chanmari FC ten MFA Super Cup semifinal an khelh hun a ni.
A sulhnu kan thlir let ang a, tualchhung football ngainatuten Lammual pan hman turin hun awl an insiam ang.
Police vanglai
MPL ṭantirh chhoh kha Police vanglai a ni a, Playoff hmanga MPL inpetling Chanmari FC chu season hmasa berah hian vawi hnih hmachhawnin an hneh ve ve.
Kum 2012 chho khan Police nena khaikhin tur khawpin Chanmari FC hi an ṭha tawk lo a, an ṭhat lai bera MPL hmasa ber nomawi an chawi lo kha Police hian tun thlengin an la ui ang.
Thlanga hun
Chanmari FC-in veteran coach H. Vanlalthlanga an lalut a, MFA Cup champion nghalin team ṭha huangah dah tel an ni. MPL2 ṭan hmain 2013 I Day Football khelh a ni a, semifinal-ah Chanmari leh Police an intawng.
RG Stadium-a inkhel hmuh-nawm bikah F. Lalrinpuia hmanga Police goal hmahruai chu Chanmari FC-in H. Lal-muankima hmangin an sut a, hun pangngaiah an inhnehtawk. Extra time-ah Lalruatfela leh Jerry Mawihmingthanga ten goal khungin Chanmari an chak a, an champion zui bawk.
Liverpool - DSK Shivajians Academy-a awm zui ta Jerry-a lar chhoh hunlai a ni a, MPL2-ah Chanmari FC-in Police hi vawi hnih an hneh ve thung a, an intawn hnuhnung zawka goal khungtu chu Jerry-a a ni.
Sawmfela hun
Coach Thlanga'n Chanmari FC a enkawl hnuah Police-in chak hmel an hmu tawh lo. HC Zarzoliana hnuaiah pawh Chanmari FC-in MPL-ah Police hi an hneh ve ve a, 2015 I Day Football-ah erawh an inhnehtawk thung.
Chanmari FC forward Mal-sawmfela hian Police nena an intum hnuhnung vawi ngaah goal a khung vek! MFA Super Cup match hnih khelh tawhah Ramhlun South tlangval hian goal a khung ve ve avangin Police tan ven uluk a ṭul khawp ang.
Hman leh tun
History keu letin Police aiin Chanmari FC an huai zawk a, tun dinhmunah hian an huai zawk kher ang em tih hi zawhna chhan har a tak a ni.
Ṭantu ṭha tak nei ṭhin Chanmari FC-in tun season I Day Football leh MFA Super Cup-ah ṭantu an nei ṭha bik lo a, Police ṭantute ai pawhin an thawm a zawi ṭhin zawk.
Chanmari FC-in I Day Foot-ball semifinal-ah awlsam taka Ramhlun North hneh an inbeisei laia a chak lo zawka an ṭan avangin entu mipui bakah khelmual chhung thlengin nghawng lian tak a nei.
Police erawh MPL aṭanga an relegate hnuah an thawkrim a, MPL kir leh an tum satliah lo - MPL an khelh loh season-ah MPL club hneha nomawi chawi an duh.
Chakna leh chak lohna
Police hian MFA Super Cup-ah match li khel tawhin goal 24 an khung tawh a, MPL club Chhinga Veng FC leh Dinthar FC lakah pawh goal thum ve ve an khung thei.
Police hian F. Lalrinpuia, Lalbiakhlua leh Lalsangbera-te an neih avangin tlar hma hi an chakna a ni a; amaherawhchu an match hnuhnung pathumah goal nga an chhuah avangin an tlar hnung a phui lo. Harsatna belhchhah turin tlar hnung pui ṭhintu Lalramtharmawia chu hrem vangin a inlan thei dawn lo.
Chanmari FC pawhin match hnih lekah goal sarih khung mah se goal goal li an chhuah tho avangin an tlar hnungah chhuan tur a awm lo.
I Day Football semifinal-ah hrem vangin C. Lalmuanawma an chhawr thei lo a, tun ṭumah pawh hian hrem vang bawkin Champhai tlangval hi a tel thei dawn lo. Chanmari FC hi an tlar hnung pawp mah se Malsawmfela leh Fela Zote te an kawl avangin goal khung lam erawh an harsat lo.
Entu lam
Team pahnih inkhelh tawh-na thlirin goal luh tamna tur inhkhelah a ngaih theih a, ṭan lam nei lo tan pawh en manhla tak a ni ngei ang.
Chanmari hian champion turin match hnih chauh an khelh a ṭul tawh avangin fans-in an banner lian an thawhchhuah pui loh pawhin khuangpui erawh player tihphur nan an lekchhuah ngei a ṭul tawh.
Mizoram Police-in hun ṭha an bawhpelh chuan eng ang pawhin hma sawn pawh ni se tun season-ah MPL club an bitum thei tawh dawn lo. MFA Super Cup hi first division club tan hun ṭha a ni a, Police ṭantute lawmna tur chu Chanmari FC hneh hi a ni.
Chanmari FC 7 - 2 Mizoram Police
MPL 1
Chanmari FC 0 - 1 Mizoram Police FC
MPFC : JS Lalruatthanga 77’
MoM: JS Lalruatthanga, MPFC
Mizoram Police FC 2 - 1 Chanmari FC
MPFC : Lalnunmawia 59’, 88’
CFC: C. Lalnuntluanga 65’
MoM: C. Lalnunmawia, MPFC
MPL 2
Chanmari FC 2 - 1 Mizoram Police FC
CFC:K.Lalchhanhima 40’; H.Lalmuankima 85’
MPFC:Lalsangbera 5’
Red Card:R.Lalawmpuia 69’, MPFC
MoM : R. Malsawmtluanga
Mizoram Police FC 0 - 1 Chanmari FC
CFC : Jerry Mawihmingthanga 90+1’
MoM : R. Malsawmtluanga, CFC
MPL 3
Mizoram Police FC 1 - 6 Chanmari FC
CFC : Laldingngheta 5'; Lalrinchhana 39' (OG); Vanlalthlamuana 60', 67', 74'; Malsawmfela 90+4'
MPFC : B. Malsawmzuala 12'
MoM : Vanlalthlamuana, CFC
Chanmari FC 1 - 0 Mizoram Police FC
CFC : Malsawmfela 79'
MoM : Joseph Lalnunpuia, CFC
MPL 4
Chanmari FC 2 - 1 Mizoram Police
CFC : Malsawmfela 9'; Lalnunmawia 28'.
MPFC : Lalfakzuala 12'
MoM : Lalrinchhana, CFC
Mizoram Police 0 - 3 Chanmari FC
CFC : Malsawmfela 5'; Lalrinchhana Tochhawng 16'; Vanlalthlamuana 56'.
MoM: Vanlalthlamuana, CFC
I Day Football 2013
Chanmari FC 3 - 2 Mizoram Police
CFC : H. Lalmuankima 79'; Lalruatfela 100'; Jerry Mawihmingthanga 107'
MPFC : F. Lalrinpuia 23', 103'
I Day Football 2015
Chanmari FC 1 - 1 Mizoram Police FC
CFC : Malsawmfela 28'.
MPFC : Lalramtharmawia 52'.