Chawnpuiin mang rama chen zel an duh Aizawl FC Vs Chawnpui FC
Thawhlehni zan khan Chawnpui FC-in anmahni ang bawka ADFA first division club Venghlui FC hnehin MFA Super Cup semifinal an lut a; zanin dar 6:30 hian Lammualah MPL club Aizawl FC an hmachhawn dawn.
Venghlui FC an hmachhawn hma chiahin Chawnpui coach Laldinthara chuan, "MPL club (Chanmari West FC) kan hneh hnua first divsion club kan hneh lo a nih chuan kan inngaidam thei lo ang," tiin Vanglaini palai a hrilh.
Penalty shootout-ah Chawn-pui an vannei a, coach Dinthara chuan, "Aizawl FC pawh hi hneh lo ila tumahin min dem lo ang. Pressure tel loin kan khel thei dawn a, MPL club ni mah se goal khung tumin kan nawr ngam ang," tiin vanneih zel a la inbeisei thu a sawi.
Mumang ram chu
Chawnpui khawtlangin an veng club thlen chin hi a sang tawh tih an hria a, Thawhlehni zanah K. Kawla Stand khat mipui an pungkhawm.
Hei hi a ni - tuna Chawnpui FC thlen chin semifinal-ah hian MPL club pariat zingah Aizawl FC leh Chanmari FC chiah an inhlangkai thei!
Hei chauh hi a ni lo, MFA Super Cup hi awm ta lo se Mizo club zinga I League khel hmasa ber MPL leh I Day Football kum zawna champion thei AFC hmachhawn hi Chawnpui FC leh MPL club ni lo tan a theih loh.
Zaninah hian Chawnpui FC-in I Day Football champion zo hlim Aizawl FC hi an hneh a nih ngai chuan an veng chanchinah hmun pawimawh tak a chang pha ngei ang. Amaherawhchu AFC hneh tur chuan an ṭhat theih dan bera an khelh a ṭul dawn a, player pawimawh H. Lalzawmliana hrem vanga a tel theih dawn loh avangin an hmabak hi a harsa sawt ang.
Penalty hmang ṭangkai
Aizawl FC-in third division club Bungkawn FC hneh turin Ghanaian forward Bright Middle-ton Mends an mamawh a, minute 60-naah goal an khung chauh. AFC hi MFA Super Cup-a an match hmasa berah 3-0 in chak mah se goal hnuhnung pahnih hi hun tawp dawna lut a ni.
K. Malsawmkima hote hian goal khung an harsat tih quarterfinal-ah a lang nawn leh a, Bethlehem Vengthlang FC laka goal an khung theih loh vangin penalty pet a ṭul a, vannei takin semifinal an thleng a tih theih.
Chutihrualin semifinal chu thleng lo se an chance ngahzia thlirin an vanduai tih an ni thung ang.
Aizawl FC boss Mala'n a sawi fo ṭhin chu 'MFA Super Cup-ah kan la champion loh avangin nomawi chawi ngei kan duh' tih hi a ni a, hei vang hian Chawnpui FC hneh an duh. Chu chauh chu a ni lo, AFC hian anmahni aia division hnuaia awm club laka chak loh hi mualphona lian tak a ni tih an hria.
Chawnpui FC-in hian Neih-dawn 5-3 a hnehin bul an ṭan a, Young Stars (ITI) nen 1-1 a inhnehtawk hnuin penalty shootout-ah 3-1 in an chak. Hemi hnu hian MPL club Chanmari West FC chu 2-0 in an hneh a, hei hi an chak chian ber ṭum a ni.
Quarterfinal-ah Chawnpui FC-in minute 71-naa Zotlang tlangval F. Zodinpuia hmangin goal khung hmasa mah se Venghlui FC-in substitute Ellis Zothansanga hmangin an sut a, penalty-ah Chawnpui 5-4 in an vannei.
Chawnpui FC hi semifinal thleng turin penalty-ah vawi hnih an chak a, Aizawl FC hian I Day Football leh MFA Super Cup belhkhawmin penalty hmangin vawi hnih an chak tawh bawk
Extra time a awm loh avangin penalty an pet leh a nih chuan Chawnpui keeper Richard Lalhruaitluanga'n Aizawl FC keeper Lalawmpuia aiin penalty a dang tam zawk tih a hriat a ṭha ang - inkhel hi a en tham ang.