EFL Cup Reds-in goal an surtir

Burnley laka 2-0 a tlawm hlim Liverpool an tho lehnghal a, Thawhlehni zan khan EFL Cup (League Cup) second round-ah Burton Albion chu 5-0 in an sawp. Reds tan rawlthar duhawm Divock Origi-a'n goal hmahruai a khung hnuah Roberto Firmino chuan chhunzawm ve lehin Tom Naylor chuan an lamah a ti lut bawk a, Daniel Sturridge chuan goal hnih hmangin a dam chiang tawh tih a pholang bawk.

Liverpool boss Jurgen Klopp-a'n Burnley hneh lo team aṭangin player pali a siksawi a, hliam vanga Premier League kaithar club laka inlan lo Sadio Mane inlan leh tawhin Championship club tan a hnawksak hle. Klopp chuan, "Duhthusam ang takin kan la khel lo a, tun thlenga ka la buaina chu Burnley laka kan tlawm dan kha a ni. Mahse, zanin match hi insiamṭhatna remchangah kan hmang a, hma kan sawn zel a ni," a ti.

Chelsea chak hram

Antonio Conte en-kawl-na hnuaiah Chelsea-in 100% chak record an neih chhunzawm zel a, Thawhlehni zana Bristol Rovers an hneh dan erawh chhuan tur a vang hle. Blues tan Michy Batshuayi leh Victor Moses ten goal an khung hnuah League One club tan Peter Hartley -a'n goal khat a sut a, Chelsea-in Batshuayi hmangin an goal thumna an khung chhunzawm.

Stamford Bridge-ah Rovers-in awlsam taka tlawm an duh lo a, Ellis Harrison-a penalty hmangin si khat dang an sut leh. Blues hmahruaina 3-2 chauh a nih hnuah Conte a mangang a, second half-ah a tira a chawlh hahdamtir Oscar, Eden Hazard leh John Terry-te a luhtir a, a vannei zawkah Blues an ṭang ta a ni.

Blues manager Conte chuan, "Game harsa tak a ni a, inkhelah kan chungnung zawk a nih chuan kan thuhnuaiah game kha kan dah tur a ni. Mahse, keini chuan chu chu kan ti lo. Hmasawn tumin kan bei ang a, a tawp thlengin theihtawp kan chhuah zel ang," tiin an chak danah a lawm a kim lo.

Thawhlehni zan EFL Cup second round inkhel dangah Derby County leh Carlisle United inkhel a hmuhnawm a, team pahnih hi extra time thlenga 1-1 a an inhnehtawk hnuah penalty hmanga chak zawk zawn a ni a, League One club Derby-in 14-13 in hnehna an chang.