Halep-i'n tennis a chawlhsan

Grand Slam vaawi 20 champion Simona Halep chuan tennis a chawlhsan thu a puang - Romanian star hi kum 33 mi chauh a la ni a, mahse a hun hnuhung lamah chanchin duhawm lo neiin a duh aia hmain a chawlh a ngai ta ni pawhin a lang.

Transylvania Open-ah Halep hi a inlan a, a match hmasa berah Lucia Bronzetti chu 6-1, 6-1 in a hneh lo - a chak loh hnuah inkhelh a chawlhsan thu a puang zui a, a thil tih ṭhat tawhte avangin hriatreng a ni tawh dawn a ni.

Kum 33 mi Halep chuan, "Tennis ka chawlhsan tur thu hi ka rilru zawng zawng ka sen hnuah ka sawi. Ka duhthusam ang ngeiin Grand Slam champion ka ni a, world number 1 dinhmun ka luah bawk.

"Tennis hnuah pawh hian hringnun ka la zawh chhunzawm ve zel dawn a, chutih hunah chuan ka khua a har ve ṭhin ngawt ang. Infiam nan chuan ka la inkhel ṭhin ang, mahse inel tur erawh chuan ka taksa in a tlin ta lo," tiin a sawi.

January thla a neih zawh tak Australian Open an khelh dawn pawh khan Halep hian buaina a lo nei tawh, a khup hliam vangin tournament a khel thei lo. Damdawi hman phal loh chungchanga buaina vangin rei tak hrem a lo ni tawh bawk.

Damdawi hman chungchangah a chaawl reng a, hremna tih tawisak a nih hnuah lo kir lehin tournament paruk a khel, mahse hlawhtlinna chan a harsa tawh, thawh chhuah ngei tumin bei mah se hliam leh harsatna dang nen a tlin ta bik lo a ni.

Halep zinkawng hi a awlsam vek bik lo; Grand Slam final a khelh hmasak pathumah a chak lo zawk a ni vek - kum 2018 French Open final-ah erawh kha chuan Sloane Stephens hnehin a champion, a hnuah Wimbledon 2019 title la turin Seren Williams a hneh leh bawk.

Hmeichhe tennis thuneitu sang Women's Tennis Association (WTA) hnuaia inelna 22 zetah a champion a, world number 1 dinhmun chu chawlhkar 64 chhung a chelh bawk a ni.