Copa del Rey semifinal-ah Atletico

Atletico Madrid-in season duhawm an hman chhunzawm zel - nimin zing khan Copa del Rey semifinal an lut a, quarterfinal-ah 5-0 ngawtin Getafe an sawp.

Metropolitano Stadium-a inkhelah Diego Simeone-a fapa Giuliano Simeone a langsar a, goal hnih a khung. Argentine winger bakah hian Samuel Lino, Ángel Correa leh Alexander Sørloth ten goal khat ṭheuh an khung a, an chak chiang.

Copa del Rey quarterfinal hi nizan khan khelh chhunzawm a ni a, Leganes khelmualah Real Madrid an leng a, he thu buatsaih a nih lai hian result kan hre hman lo.

Quarterfinal match hnih hmabak a la awm a, zanin dar 12:00 hian Real Sociedad chuan Osasuna an mikhual ang a, Barcelona-in naktuk zing dar 2:00-ah Valencia an lenchilh ve leh bawk ang.

Sial rangin sial rang

Quarterfinal a nih tawh avangin Simeone-a'n chak ngei a duh a, Getafe lakah a chhuanvawr pahnih Antoine Griezmann leh Julian Alvarez te bul a ṭantir a, a tawpa langsar ber erawh a fapa a ni daih!

Simeone-a fapa Giuliano Simeone hian minute riatnaah goal khung ṭanin, minute 17-naah a belhchhah a, Samuel Lino chuan minute 42-naah a khung ve leh bawk avangin first half chhungin goal thum an khung hman.

Kum 22 mi Giuliano hi Atletico Madrid academy chhuak niin, Real Zaragoza leh Alaves-ah te loan-in a khel tih loh chu club dang tan a la khel ngai lo - a pa enkawlna hnuaiah a vul mek.

November 19, 2024-a Argentina tana a match hmasa ber kheltu Simeone hian tun season inelna hrang hrangah match 28 khelin goal li a khung tawh a, assist vawi nga a nei bawk.

A thawh hnihna

Atletico Madrid-in goal thuma duhtawk mai an tum lo - second half-ah goal khung belh tumin Getafe an nawr a, Giuliano-a'n hattrick a siamah inngai mah se, offside vangin a goal thumna chu pawmsak a ni lo.

Simeone-a'n hattrick siamtir kher tum loin, minute 62-naah a fapa Giuliano hi a la chhuak a, Atletico fan-ten an coach fapa hi a khelh ṭhat vanga lawmthu hrilh nan ding chunga kut bengin an thlah.

Minute 78-naah Ángel Correa inlar ve lehin, Atletico goal lina a khung a, hun tawp nan minute li chiah a awm tawh tihah Alexander Sørloth chuan a hmawr bawkin, an goal ngana a khung.

Kum 29 mi Sørloth hian nipui transfer lai khan Atletico hi euro maktaduai 32 thlenga a man sang chho thei turin a zawm a, season ṭantirah sawisel tawk mah se, match 30-ah goal 11 a khung ta a, assist vawi hnih a nei bawk.