Joao Felix-a'n AC Milan a zawm

Chelsea forward Joao Felix chuan season tawp thlenga loan hmanga khelh turin AC Milan a zawm. Italian club hian loan fee atan pound maktaduai nga an pe a, nipui bazara lei theihna erawh a tel lo thung.

Thlasik bazar hi Thawhṭanni zan khan a tawp a, Joao Felix-a'n Milan a zawm thu Thawhlehniah puanzar a ni chauh. Club pahnih hian document pawimawh zawng zawng transfer hun chhungin an tihfel hman vang a ni.

Kum 25 mi Felix hian nikum August thla khan Atletico Madrid aṭangin £45mtd-in Stamford Bridge hi a zawm a, kum sarih daih contract a ziak. Portuguese forward hian 2022-23 season chawhnu lam khan loan hmangin London club tan hian a khel tawh bawk.

Benfica aṭanga khawvel hriata lar chhuak Felix hian July 2019 khan £113mtd zetin Atletico zawm mah se beisei a pha zui lo hle. Portuguese hian Benfica tan Primeira Liga season khat chauh a khel a, match 26 aṭangin goal 15 a khung.

Felix man hi tam viau mah se season khat chhungin league-ah goal 10 khung tling a nei tawh lo a, Atletico Madrid tana a khung tam ber ṭumin La Liga-ah goal riat a khung. Loan hmanga Barcelona tana khelh ṭum pawhin league match 30 aṭangin goal sarih a khung.

Chelsea tan tun season-ah league match 12 khel tawh mah se goal khat chiah a la khung a, Enzo Maresca hnuaiah hmun pawimawh a chang pha lo. Chutihrualin Milan tan Felix hi a che ṭha a nih chuan June 30, 2025-ah a contract a zo ang a, June 14 aṭanga khelh ṭan tur 2025 Club World Cup atan Maresca-a'n a thlang thei ang.