Kan inven theih vangin ka lawm - Enrique

Paris Saint Germain chuan Thawhlehni zan khan Le Mans chu 2-0 in an hneh a, harsatna lian tham lutuk tawk loin French Cup quarterfinal an in pet kai a, coach Luis Enrique chu an khelh danah a lungawi hle.

Brest nen Ligue 1 match hautak an khelh aṭangin ni thum chauh a liam hman a, match dang khel turin Paris club hi khaw thlang lamah an zin zui leh nghal. Enrique chuan a player ṭha ṭhenkhat chu hahchawlhna hun a pe thung.

Stade Marie-Marvingt-a inkhelah, mikhual team tan Desire Doue chuan chawlhlawk hmain goal khatna a khung a, inkhel chawhnu lamah Bradley Barcola chuan an goal hnihna leh chak nemnghehna ni bawk a khung.

PSG coach Enrique chuan, "French Cup nihna tak kan hmu leh, inkhel hlauhawm leh sawi lawk harsa tak kan hmachhawn leh a ni. Thil tam tak kha kan thunun theih loh thil a awm, chutihrualin a pumpui thlir chuan kan ti ṭha hlein ka hria.

"Player ṭhenkhatin hahchawlhna hun an hmang a, chutiang karah chuan quarterfinal kan lut thei ta tho. Tuna kan thlen chin leh result kan neihah hian lawm tur kan ni a, a tawp erawh kan la thleng lo tih hriat a ṭha," tiin a sawi.

PSG hian Ligue 1 hma an hruai mek a, an champion leh pawh a rinawm. French Cup bakah hian champion an chak berna Champions League last 16 playoff khelh hmabak an la nei bawk a, an tan player insiksawi hi a ngai a ni.