Bayern-ah Davis a nghet

Alphonso Davies chuan Bayern Munich tan contract thar a ziak, an inremna hi kum nga daih niin kum 2030 June thla thleng chu Allianz Arena-ah hun a hmang zui dawn tihna a ni.

Kum 24 mi Davis hi Real Madrid pawhin an ngaihven ṭhin a, lakluh an tum nia sawi pawh a awm. Mahse, tunah chuan German club hian an thlungnghet ṭha hle a, la chhuak tur chuan ama rilru hneh bakah sum sen huai a ngai hle ang.

Canada international Davis-a contract hmasa khan kumin June hi a tawp hun a ni tawh, inremna an ziah mai loh vang khan club dang hming pawh a ri hman hial, tunah erawh Bavarians tan chuan ngaihṭha takin a awm theih.

Davis chuan, "Kum 18 mi ka nih khan Bayern Munich hi ka zawm a, hun hlimawm leh nuam tam tak kan lo tawng dun tawh. Tunah inremna rei zawk kan nei thei hi ka lawm a, hlawhtlinna tam zawk kan chan ngei pawh ka beisei," tiin a sawi.

Vincent Kompany enkawlna hnuaiah Davis hian hmun pawimawh a chang, tun season inelna hrang hrangah match 25 khel tawhin goal khat a khung a, a ṭhiante khung tur vawi thum a siamsak bawk.

Tun dinhmunah Bayern Munich hian Bundesliga table-ah hma an hruai mek a, champion lai Bayer Leverkusen aiin point rukin an hmu hnem zawk - Bundesliga bakah Champions League nomawi chawi an tum ang.