Goa-in Odisha mikhual dawn

FC Goa-in an league match hnuhnung bera Jamshedpur FC an ngam loh hnuah, zanin dar 7:30 hian Odisha an mikhual dawn - Goan club hi top two-a awm a, semifinal inpetkai nghal tum an ni a, Odisha-in playoff an beisei thung.

Odisha hian an match hnuhnung berah vawi hnih ngawt si an phurh hnuin si phurh an sut zo a, NorthEast United nen 2-2 in an inhnehtawk - hliam damkawr Isak Vanlalruatfela'n goal a khung bakah assist vawi khat a nei. Point khat an hlawh chhuak hram a, playoff khel phak chin parukna an phak lohna hi point thum a ni mek.

Goan club hian an match hnuhnung berah Jamshedpur chu 3-1 in an ngam lo a, FC Goa tana goal awmchhun khungtu hi Dinthar tlangval Ayush Chhetri a ni thung - Mizoram player-te chet ṭhatna team pahnih zaninah an intawng dawn.

Ayush hi Goan club-in season bul an ṭan ṭhat loh hnu, coach Manolo Márquez-a'n team leh khelh dan a siksawi hnua a player pawimawh zinga mi a ni a, zaninah pawh bul ṭan tura beisei a ni.

Hetihlai hian Odisha tan Jerry Mawihmingthanga, Jerry Lalrinzuala leh K. Lalṭhathanga (Puitea) te chu bul ṭan leh ngei tura beisei an ni a, Isak-a pawh hliam damkawr a nih avanga an dim deuh a nih pawhin bench aṭang tal chuan a lut ang.