Man City tantuten Hart an thlah?
Pep Guardiola hnuaia a vawi khat nan Joe Hart a in-lan a, Steaua Bucharest an hmachhawn ṭumah England no. 1 keeper hian captain armband hreng mah se Manchester City jersey a hak hnuhnun ber ṭum a nih theih avangin inkhel entu mipui mit fukna chu 'Charles Joseph John Hart' a ni.
Romanian club Steaua Bucharest-in an muala 5-0 ngawta an hneh tawh loh City lakah chak an beisei lo a, goal venhim hna an thawh avang leh Spanish manager Pep-a'n player pawimawh a awltir avangin English club-in goal khat chiah an khung belh.
Nilaini zana Eitihad Sta-dium-a goal awmchhun khung-tu hi Fabian Delph a ni a, English midfielder hian minute 56-naah Jesus Navas cross chu a tauh lut. Kum 26-a upa Delph hian thla 13 liam taa Aston Villa aṭanga City a zawm hnuah goal thum a khungna chauh a ni.
Hart thlahna chu
Guardiola hnuaia match hmasa pathumah Hart aiin Willy Caballero chu thlan a ni a, inkhel pawimawh tawh loa Spanish manager-in Hart a captain tir chhan hi City
ṭantuten an club legend thlahna hun nei ve se tihna a ni ber.
England no. 1 keeper Hart emaw player dang emaw pawh ni se Champions League playoff an khelh avangin transfer-ah an hlutna a tlakhniam phah lo. Kum 29-a upa Hart hian Europe-a club inelna sang bera telpha club pawh zawm se Champions League-ah a inlan thei tho ang. City keeper-in hma a hruai a, Etihad Stadium-a entu mipui an ṭha nghal hle.
Inkhelh ṭan aṭanga minute hnihna lekah Hart-a'n a vawi khat nan ball a khawih a, back-pass satliah chauh a ni nachungin entu mipui lam chuan goal khung an lawm tluk zetin an thawm a ring nghal. Minute 65-naah City
ṭantu mipuite chuan 'Joe Hart hmangaih zawng zawng ding rual ang u' tiin an zai rual a, Etihad Stadium-ah boruak danglam a thleng - Hart hian he hun hi a hre reng tawh ang.
Instagram lamah Joe Hart chuan, "Zan danglam bik hi football vang hian ka tawng fo tawh a, zanin bik erawh ka suangtuah phak loh lam daih a ni. Ka vanneih zia leh ka lawm zia hi ka sawifiah thiam lo. Ka hma lam hun ka sawi thei lo a, eng pawh thleng se zanin hi ka theihnghilh lo ang. Ka lawm e," tiin City ṭantute chungah lawmthu a sawi.
Engtin zel?
Guardiola-a'n Hart a thlan loh chhan hi a ke hmanga ball a sem thiam tawk loh vang a ni ber a, Steaua Bucharest an hmachhawn ṭum hian English keeper ball pass zawng zawng a dik vek lawi si. Hetichung hian Spanish manager hian a rilru a thlak dawn lo a, City ṭantuten an keeper hi hmangaih mah se coach mit a tlung zo lo.
A hmalam hun chungchanga zawhna chhangin Hart chuan, "Sawi tur a awm lo. Thil thleng tur chu a thleng vek tawh a, kei aia hrechiang vek in ni," tiin City-ah hmun a neih loh thu a sawi. Kum 2006 khan City-in Shrewsbury Town aṭangin £600,000 in Hart hi an lalut a; Premier League nomawi vawi hnih, FA Cup nomawi vawi khat leh League Cup nomawi vawi hnih an chawina kawngah player pawimawh a ni.
Spanish manager Guardiola chuan, "Thutlukna siam turin helai hmunah hian ka rawn kal a ni. Tih dik ka neih ṭeuh tawh ang bawkin tihsual ka nei tawh. Amaherawhchu ka hmuh dan zep ka tum lo a, Joe leh squad-a player dang zawng te bulah ka rilru dik tak ka hrilh vek. Tun dinhmunah chuan Joe hi Man City player a ni a, Bucharest an hmachhawn ṭuma ṭha taka a khel thei hi ka lawm hle a ni," tiin a dinna ngaia a din thu a sawi.
Claudio Bravo chungchang sawi langin Pep chuan, "Fan-te'n engtin nge an lo mikhual dawn tih kan hre lo, amaherawhchu an rilru tak an lantir thei ang. Mi zawng zawng tihhlim tum mah ila thil theih erawh a ni lo, player 28 ka neih avangin 17 tan khelh theih a ni lo. City hian Europe-ah sulhnu ṭha a nei lo a, chuvangin club ṭhatna turin thutlukna ka siam ṭul a ni. Hei hi manager atana min rawih chhan a ni," tiin ṭan chhan a neih thu a sawi.