Keane a chawl dawn

Robbie Keane chuan August 31-a Oman nen Dublin-a friendly match an khelh tur chu Republic of Ireland tana a inlan hnuhnun ber tur a nih thu a sawi.

Kum 36-a upa Keane hian ram tana a match hmasa ber ni turin 1998 March thla khan Czech Republic a hmachhawn a, ram tan match 145 khela goal 67 khungin Ireland tana goal khung hnem ber a ni.

Nilaini khan 2018 Rus-sia World Cup quali-fier-a Serbia hmachhawn tur Republic of Ireland squad puan niin Keane hming pawh telh a ni. Mahse, Tottenhman stri-ker hlui hian Serbia a hmachhawn dawn tawh lo tihna a ni ang.

Keane chuan, "Kum 1998 a bul ka ṭan aṭang-a kum 18 chuang chhung zet Irish national team zinga ka tel ve thei hi ka tan chuan zinkawng ngaihnawm leh hlim-awm tak a ni. Kei leh ka chhungkaw tan chuan kum 10 chuang zet captain ka ni te kha chawi-mawina a ni," a ti.

Manager Martin O'Neill-a'n Euro 2016-ah khan Keane hi hruai mah se rinrawlah a hmang tawh lo a, Sweden leh Belgium an hmachhawn ṭum khan bench aṭangin tlan luhtir a ni.

LA Galaxy striker chuan 2002 World Cup kha a inkhelh hun chhunga a hun tawn nuam leh hriatreng tawh tur a nih thu a sawi lang tel bawk.

Keane chuan, "2002 World Cup-a Germany kan hmachhawn ṭuma Oliver Kahn goal vena ka pet luh kha a ropui ka ti a, ka hun tawnah chuan ka theihnghilh ngai tawh loh tur a ni," a ti.

Liverpool tan pawha lo khel tawh Keane hi Republic of Ireland tana match 100 khel tling thei player pali zinga pakhat a ni a, karleha Oman an khelh hunah goal khung lo pawh nise Europe ram zingah mahni ram tana goal khung hnem lamah German legend Gerd Muller, Ferenc Puskas, Sandor Kocsis leh Miroslav Klose te chiah tluk loh a nei.

Republic manager Martin O'Neill chuan, "Keane-a'n ram tana goal khung hnem ber record a siam hi kum theih mai a nih tawh ka ring lo a, a din reng ka beisei. A hnun-ruak kalsan a zau dawn a, hnawhkhat tur chuan hun a ngai hle ang," tiin an legend chawlh tur chung-chang a hriat hnuah a sawi.