Federer-a'n Australion Open a thlir

Roger Federer chuan nakkuma Grand Slam tournamnet hmasa ber tur 2016 Australian Open chu court chhunga a lo kir lehna hmasa a nih a beisei thu a sawi chhuak.

Grand Slam vawi 17 champion tawh Federer hi July thla tawp lama Wimbledon semifinal-a Milos Raonic a hneh loh hnuah a la inkhel leh lo a, hun rei zawk a inkhelh theihna tur a nih beisein kumin chhung chu inkhelh a tum tawh lo - Rio Olym-pic-ah a inlan loh bakah US Open leh World Tour Finals-ah a inlan dawn lo bawk tihna a ni.

Kum 35-a upa Federer chuan, "Nakkuma inkhel ṭan leh turin tunah hian ka inbuatsaih mek a, tluang takin hmalam pawh ka pan zel. Kuminah chuan tun hmalama ka la tawn ngai loh thil ka tawng hnem em em a, ka tan chuan zirlai ṭha tak vek an ni," a ti. Vawi nga a lo champion tawhna US Open-a a inlan loh tur hrehawm a tih thu a sawi tel bawk.

Swiss thiampuipa chuan sawi chhun-zawm-in,"Inkhel thei loa awm hi a hrehawm a, a bik takin Rio Olympic neih laia ram tana ka inlan thei lo kha a hrehawm zual. A tam thei ang ber inkhelh duh mah ila tu tan mah a zawng zawnga lan kim vek chu a theih loh a ni," tiin a sawi. Khawvela ten-nis player ropui ber pakhat hi Olympic singles gold medal la loin a her liam ve dawn nge nge niin a lang.

Federer hi kumin Feb-ruary thla khan a khup a na a, hliam dang neuh neuh bakah a hnungzâng na vangin a buai fo bawk, a kum a tam ve deuh tawh a, hun rei zawk inkheh zel a duh avangin kumin atan chuan hahchawl turin thu-tlukna a siam fel rih tawh a ni.

Kuminah hian inelna lian pahnih hmabak a la awm a, Thawhṭanni aṭang khian US Open khelh ṭan a ni dawn a, hemi hnuah ATP ranking-a a sang pariat chin ten O2 Arena, London-ah ATP World Tour Finals an khel leh dawn a ni.