Bundesliga Champion lai Bayern inlan nghal dawn

Zanin dar 12:30 hian German tun season Bundesliga-a match hmasa ber khelh ṭan a ni dawn a, champion lai Bayern Munich chuan Allianz Arena-ah Werder Bremen an lo mikhual ang.

Bayern hian tun hnai season li chhung chu a zawnin league nomawi an chawi tawh a, season hmasa khan anmahni hnaih bertu Borussia Dortmund nen an inthlauhna chu point 10 zet a ni - zanina an hmachhawn tur Werder Bremen erawh nikum khan 13-na an ni phak hram chauh.

Manager thar

Pep Guardiola kaihhruaina hnuaiah Bayern hian season thum chhung khing zotu hmu lo mah se Spanish manager hian Premier League club Manchester City a pan san a, manager thar Carlo Ancelotti enkawlna hnuaia bulṭan tur Bayern hian eng chen nge an thlen ve dawn tih chu hunin a la hril zel ang.

Real Madrid coach hlui Ancelotti hi Giovanni Trapattoni, Nevio Scala leh Roberto Di Matteo te hnung zuiin Italian manager zinga Bundesliga club enkawl thei palina a ni a, league season ṭan hmain German Super Cup chawi tawhin DFB Cup first leg-ah 5-0 in hnehna an chang tawh bawk.

Mahse, Italian manager hian Germun club a enkawl dawn tih a chian tirh khan an tum ber chu Bundesliga nomawi chawi a nih thu a lo sawi tawh avangin zanin hi an season tak tak bul
ṭanna tur anga ngaih theih a ni. AC Milan, Chelsea FC leh Paris Saint-Germain lama tawnhriat lo nei tawh manager hi German-ah pawh a ngaihtuahawm loh tura ngaih a ni.

Hmel thar

Bayern hian Dortmund
aṭangin Mats Hummels an la let a, German defender hi a club hluia a kir hnuah zanin hian a league match hmasa ber khel tura beisei niin Jerome Boateng nen tlar hnung an luah lum ang.

Kum 27-a upa Hummels hian kum 8 a upa chauh a nih laiin Bayern hi a lo zawm tawh a, senior team tan match khat chauh a inlan hman tihin a chhuak. Dortmund tan league champion vawi hnih a nih hnuah a club hluiah a kir leh a ni.

Europe-a rawlthar beiseiawm ber pawl Renato Sanches chuan Benfica aṭangin Allianz Arena a zawm bawk a, Euro 2016-a Portugal champion puitu hi hliam avangin zanin hian a la inlan theih a rinawm loh thung. Euro Best Young Player hi inlan thei lo mah se Bayern hian midfield a khel thei tawnhriat nei ṭha an kawl nual avangin harsatna a awm lo tura ngaih a ni.

Bayern innghahna tur chu striker Robert Lewandowski a ni leh ang. Poland international hian season hmasa khan league-ah goal 30 khungin ani aia khung hnem an awm lo, amah hnaih bertu Dortmund striker Pierre-Emerick Aubameyang aiin goal ngain a khung tam.

Zanina Bayern hmachhawn tur Werder Bremen-ah hian an player hlui Claudio Pizarro a awm ve thung a, ani hian Bayern tan goal 87 khung tawhin Bundesliga player zinga goal khung thei berte zinga mi a ni - zaninah pawh Ancelotti naute tan ani hi ven uluk ngai bik a ni thei ang.

Inlan tura beiseite

Bayern Munich (4-3-3 formation): Neuer; Rafinha, Martinez, Alaba, Bernat; Vidal, Lahm, Kimmich; Muller, Lewandowski, Ribery

Werder Bremen (4-2-3-1 formation): Wiedwald; Selassie, Lamine Sane, Moisander, Sternberg; Fritz, Junuzovic; Yatabare, Kruse, Bartels; Thy.