Police ngam loh Chanmari FC Sawmfela
Chanmari FC-in Mizoram Police lakah 5-star game khelin goal 5 an khung a, MFA Super Cup semifinal-a goal chhuah loin final an thleng.
MFA Super Cup final hi Inrinni chawhnu dar 2:00 hian Lammualah khelh a ni dawn a, Chanmari FC-in nizan lama inkhel Chawnpui FC leh Aizawl FC chak zawk an hmachhawn ang.
Chanmari FC-in MPL hmasa bera Police an hneh loh hnuah vawi kua hmachhawn leh tawhin vawi riat an chak a, vawi khat dang erawh an inhnehtawk. Nimin inkhelah hian Malsawmfela'n hattrick a siam bakah R. Malsawmtluanga leh Lalmuanzova ten goal khat ve ve a khung a, Chanmari FC-in Police 5-0 in an sawp.
Rosanga hoin
I Day Football semifinal-ah C. Lalmuanawma hrem vangin a inlan thei lo a, Chanmari coach Lalsangzuala Hmar-in Champhai tlangval thlak nan MS Dawngzela a hmang. MFA Super Cup semifinal-ah erawh Police tlar hmate an tlan chak tih hre rengin Notea aiin tharum ngah zawk Lunglei tlangval C. Lalrosanga luhtir a ni.
Chanmari FC tlar hnung a phui ṭha ta lo a nih pawhin buaina tur a awm lo - Sawmfela leh Lalruatfela Zote te tlar hmaah an inkawp.
Squad pan
Mizoram Police-in MPL4-ah khan F. Lalrinpuia leh Lalbiak-hlua te kha nei se, an relegate lo ang. Amaherawhchu player ṭha pahnih pawh hi awm ta reng se an squad a chhah miau loh avangin tlak hlauhawm zingah chuan an awm tho ang.
Midfielder pawimawh Lal-ram--tharmawia hrem vangin a khel thei lo a, winger ṭha Lalfak-zuala, tawnhriat nei ṭha keeper Vanlalhriata leh defender B. Zoramthanga te chu damloh vangin an inlan thei lo.
Police enkawltuten Dinthar FC an hneh ṭuma starting eleven aṭangin player pali ngawt an thlak a; inkhel bul ṭantu zingah Andrew Lalhmingliana, TC Vanlalhruaia, Vanlaldika leh R. Vanlalhriata te chu telh an ni.
Police ngamtu Sawmfela
Chanmari FC-in goal khung turin hun an mamawh rei lo a, minute hnihna lekah vei lam aṭanga Fela Zote cross chu Sawmfela'n a pet goal nghal. Police-in MPL club Chhinga Veng leh Dinthar FC te an hmachhawn ṭumin goal an chhuah hmasak zel avangin Chanmari FC dinhmun a la ṭha bik lo.
Police midfielder Hriata'n Chanmari rum ṭhaih turin crossbar a tauh per a, inkhel thununtu zawk erawh Lalsangzuala Hmar hote an ni.
Sawmfela'n Chanmari goal hnihna minute 33-naah a khung a, Ramhlun South tlangval hian goal khung turin Police defender ṭha Lalhmunmawia chiang taka bumin striker nazawng khung theih loh goal danglam bik a khung.
Dam chiang loa khel Fela Zote chu minute 38-naah thlak a ni a, Republic Vengthlang tlangvalin a piancham goal nen a lawm thei lo. First half tawp hma hretin Police defender Hruaia'n Chanmari winger Lalrammawia box chhung-ah pet tlu mah se referee-in penalty a pek loh avangin goal dang a luh belh lo.
A goal zel
Second half ṭan aṭanga minute thumna lekah Chanmari winger Ṭhasiama'n ṭha takin a lalut a, midfielder Lalrinchhana'n pet fuh lo mah se MS-a'n chiang zetin a pet lut.
Police an insiam-ṭhat hmain Sawmfela bawk a inlar a, minute 49-naah box pawn aṭang chiahin mawi zetin a volley goal. Ramhlun South tlangvalin hattrick a siam a, goal pathum hian 'striker special' a ni tih a lantir vek.
Minute 52-naah Lalmuan-zova'n Chanmari FC goal ngana a khung a, amaherawhchu ruah nasa taka a sur avangin Police an muaphona belchhahin a awm tawh lo.
Chanmari FC captain Lalrin-chhana'n midfielder Rinchhana pass chu ṭum hnih ngawt a khung thei lo a, MPL club-in goal khung belhna chance ṭha an ngah rualin Police pawhin goal khung theihna tur an hlah ve bawk.
Beisei loh lam
Mizoram Police coach Ṭial-thawnga chuan, "Inhliam kan ngah avangin kan duh angin player kan rem thei lo a, chutihrualin hetiang em em a goal tam chu kan chhuah kan ring lo. Kan khel fuh lo a ni," tiin Vanglaini palai a hrilh.
Police hian goal nga zet an chhuah avangin team ṭha lo an ni tihna erawh a ni lo a, MFA Super Cup Last 16 thlengin turin goal 18 an khung. Hemi hnu hian MPL club Chhinga Veng leh Dinthar FC lakah goal thum ve ve khungin hnehna an la chang leh bawk.
Chanmari tak tak?
Chanmari FC-in Mizoram Police lakah goal nga an khung a, goal an chhuah lo. Chanmarians-in khuang nen an team rawn
ṭawiawm bawk mah se Chanmari FC ṭhat theih dan ber a la ni lo.
MPL season li awm tawha
ṭantu nei ṭha ber ṭhin khan hmuh-nawm tham ṭantu an nei lo a, final-ah an insiamṭhat loh chuan an hmachhawn theih tur Aizawl FC emaw Chawnpui FC ai pawhin
ṭantu an nei ṭha dawn lo tih a chiang.
Khelmual chhungah erawh Sawmfela ṭhat ber lai kan hmu a, Police lamah hattrick a siam. Ramhlun South tlangval hian Police a hmachhawn hnuhnung parukah goal riat khungin match zawng zawngah hian goal a khung vek.