Foxes tan Drinkwater a rinawm

Leicester midfielder Danny Drinkwater chuan Premier League champion tana season nga dang khelh chhunzawm turin contract thar a ziak a, Tottenham Hotspurs lam pan tura sawi thawm awm chu a dik lohzia a nemnghet.

Season hman zawh taka Foxes-in league nomawi an chawi theih nana player ṭangkai ber pawl chuan, "He club tana khelh hi nuam ka tih em avangin contract thar ka ziak thei hi ka lawm takzet a ni. Ka career tan thutlukna dik ka siam niah ka ngai a, he hmuna rei tak cham hi ka duh a ni," a ti.

Leicester enkawl tura season li dang contract thar ziaktu manager Claudio Ranieri chuan, "Foxes ka pan tirh aṭang khan Danny hi kan player pawimawh a ni nghal a, hun rei tak chhung kan hnena cham chhunzawm turin ka duh a ni," tiin an midfielder chu contract thar an ziahpui chhan a sawi.

Leicester-in league nomawi an chawina kawnga player pawi-mawhte contract thar an ziahpui nual a, Chelsea lakah N'Golo Kante chan mah se Drinkwater hma hian Riyad Mahrez, Jamie Vardy, Kasper Schmeichel, Wes Morgan leh Andy King te chuan contract thar an ziak tawh a ni.