Reds manager ropui nih tum Klopp

Liverpool manager Jurgen Klopp chuan Reds manager ropui pahnih Bill Shankly leh Bob Paisley te anga hlawhtlin a duh thu a sawi. Klopp hian October 2015 khan Reds hi a zawm a, Premier League-ah pariatna dinhmun luahpuiin League Cup leh Europa League-ah final lut mah se nomawi an chawi lo thung.

Kum 49-a upa manager chuan, "Hun kal taah khan ka cheng reng tihna a ni lo a, mah se kha hun kal tawha thil ropui takte kha vawiina he club dinhmun chawisangtu hi a ni. Kan manager ropui takte kha an hlu a, an hnathawh ropui tak kha min puituah kan hmang thei a ni," a ti.

Shankly khan kum 1959-74 inkarah Reds kaihruaiin First division league (3) FA Cup (2) leh UEFA Cup (1)-ah te a champion pui a, Paisley khan 1976-83 inkarah First division league (6), European Cup (3), UEFA Cup (1) leh League Cup (3)-ah te a champion pui thung a, an sulhnu chhui a hautak dawn.

July thlaa season ruk dang Anfield-a cham tura contract ziaktu manager chuan sawi chhunzawmin, "Kum ruk chhung Reds-ah hian hlawhtlinna chan char char ka duh a, bus chung nei loa chuang chunga nomawi nen Liverpool khawpui hi fan kual ka duh a ni," tiin Anfield-ah nomawi chawi ziah a duh thu a sawi.

Liverpool-a pan hmain Klopp-a'n Borussia Dortmund a enkawl a, German club hi fans neih ṭhatah an lar hle. Mahse, Klopp chuan, "Mainz-ah mi 20,000 velin min ṭawiawm ṭhin a, Dortmund-ah 80,000 velin. Mahse, nikum Europa League quarterfinal second half-a Dortmund laka kan comeback tluka nuam tih kha ka la nei lo a, min dang thei tur an awm lo ni hialin ka hria," a ti.

Klopp chuan fan-ten nuam ti taka inkhel an en theih nana game hmuhnawm chhawpchhuah chu a tum ber a nih thu sawiin, "Inkhel hriatreng tlak a zawna neih theih hi ka tum hmasak ber chu a ni a, mipuiten kan inkhel leh tur hi nghakhlel em em zel se ka duh ber. Hei hi kan ti thei a nih chuan kan hlawhtling tihna a ni ang," tiin a sawi.