Pune-ah Gudjohnsen a lut

Indian Super League club Pune City chuan season thar atan Chelsea leh Barcelona striker hlui Eidur Gudjohnsen an lalut. Kum 37-a upa striker hian Euro 2016 khelh zawh takah pawh khan Iceland tan a la khel a, ram tan match 88-ah goal 26 khungin ram tana goal khung hnem ber a ni mek.

Chelsea tan a khelh laia Premier League nomawi pahnih chawitu striker chuan, "Club tam takin min lakluh tumin min dawr a, mah se Pune City-in min duh tih ka hriat khan an ruahmanna ten ka rilru an luah nghal a, khawdang ka hawi thei lo. Coach-in min ringtawk a, min lakluh tumin a thawkrim hle. Hlawhtlinna chang tur chuan phurna neih reng a ngai a, chu phurna nasa tak nen chuan Pune hi ka zawm a, nitin training neih hi nuam ka la ti a ni," tiin chawlh lam a la ngaihsak loh hmel hle.

Pune City coach An-to^-nio Habas chuan, "Ei-dur hian inelna sang ber thlengin tawnhriat ropui tak a nei a, kum tam tak chhung chu ka striker duh per pawl a lo ni tawh ṭhin. Vawiina Pune City tana kan thawkdun thei tur hian min ti lawm takzet a ni," tiin season hman zawh taka Ole Gunnar Solskjaer enkawl Norwegian club Molde FK tana khel striker chungchang a sawi.

Eidur Gudjohnsen hian Bolton Wanderers tan a khelh laiin a hming a chher ṭan a, Chelsea tan season ruk a khelh hnuah Barcelona zawmin Catalan club-ah hian La Liga, Copa del Rey, Spanish Super Cup, Champions League leh UEFA Super Cup nomawi chawiin champion theihna zawng zawngah a champion vek a ni.