Hmeichhe World Cup England an vanduai; Japan an kal zel
Nimin zing khan Hmeichhe World Cup semifinal hnuhnung zawkah thawm nei na England leh champion lai Japan an inkhel a, ropui taka khel chungin England hmeichhe team 1-2 in an chak lo.
Kum 1966 a England mipa team-in World Cup an chawi hnuin inelna lianthamah England senior team mipa leh hmeichhia-in eng trophy mah an la chawi leh lo a, an record duhawm lo hi thaibo turin English mipui te'n an hmeichhe team beiseina nen an thlir.
Inkhel chu
Inkhel an ṭan a, Japan hmeichhe team-in ball chang tam mah se England tan Jodie Taylor leh Toni Duggan ten chance ṭha an nei nghal. Goal khung hmasa tu erawh Japan an ni.
Minute 32 naah England left-back Claire Rafferty-in Saori Ariyos lakah penalty a chawi a, a foul na hi penalty box pawn niin lang mah se referee-in penalty a pe tlat. Japan tan captain Miyama a rawn pen chhuak a, Japan hmahruaina goal a khung.
Si phur zawk England an hlauhawm chhunzawm a, minute 40 naah penalty an hlawhchhuak ve lehnghal. Fara Williams-i'n Lionesses (England hmeichhe team sawina) si phurh sut nan a pet goal.
Japan-in ball an in pass chhunzawm a, England-in ball an chan chhunah Japan tlarhnung an chhaih buai thung. Goal erawh a lut thei lawk lo a, extra time khelh a ngai dawn niin a lang hman.
Mahse, injury time-ah England an chesual a, defender Laura Bassett-i'n an lamah a tauh lut. Minute hnih hnuah hun a tawp zui a, England an tlawm.
Ball chang tam Japan khel a mawi a, a vawi khat nana Hmeichhe World Cup semifinal khel England chak phu chungin an tla.
England a ṭap
Khawvela football ngaihhlutna ber pawl ram ni siin England-in trophy liantham an chawi hleithei lo a, beiseina sang tak an neih chu Japan hmeichhe team-in an chhutchhiat sak.
Hun tawp rualin England player te an
ṭap a, anmahni lama tauh luttu Notts County defender Bassett-i chu kaihchhuah ngai hial khawpin a ṭap nasa.
England manager Mark Sampson chuan, "Mipui rin kai phak lo nichung leh kan ram mipui te min beiseina rit tak phur chungin he hmunah hian kan rawn kal a, chuti chung chuan ka player-te hian kan ram tan thil ropui tak an tih avangin ropui taka chawimawi an phu a ni," a ti.
Sampson chuan anmahni lama pet goal tu Bassett-i chu hnemin a team te'n an entawn ber leh tournament chhung zawnga England tiphur ṭhintu a nih thu a sawi.
England captain Steph Houghton chuan, "Ka teammate leh staff zawng zawngte an hnathawh ropui tak avangin ka chhuang takzet a ni. England kawr ha chung ngeia World Cup final khelh ngei kan tum a, kan vanduai ta a ni," tiin a ṭhian te inpekna a fak.