Petre Cech chungchangah Mourinho a ṭawngchhuak

Chelsea manager Jose Mourinho chuan Petr Cech-a'n an hmelma Arsenal zawm tura thu­tlukna a siam chu a hriatthiampui thu a sawi.

Mourinho chuan, "Petr hian kum 11 chhung­in Chelsea tan rinawm takin a thawk a, inelna champion theih zawng zawng deuh tho chu min lakpui vek a ni. Ka duh dan chuan Petr hi kan bulah awm zel se tih a ni a, mahse kartina inkhelh a duh avangin a chhuak hi ka hriatthiampui a ni," tiin Arsenal keeper thar chungchang a sawi.

Portuguese manager chuan sawi zelin, "Club tana a thawhhlawk em avangin a duh dan zah sak hi a phu a, club neitu thlukna hi ka ṭawmpui a ni. Hetiang thutlukna siam thei club hi an tam lo a, kan club rilru put hmang a lang chiang hlein ka hria. Chelsea tana Petr-a hlawhtlinna hriat reng a ni tawh dawn a, a thiltihte avang hian a chungah kan lawm takzet a ni," tiin Cech chhuah chungchangah Chelsea neitu Roman Abramovic a inrawlh telh thu a sawi.

Czech Republic keeper Cech hian Mou­rinho hnuaiah August 2004 khan Chelsea tan bul a ṭan a, Portuguese manager hnuaiah hian league title pathum bakah FA Cup leh League Cup-ah a champion.

Cech chuan, "Season hman zawh tak ṭan tirh khan Mourinho-a'n thu­tlukna a siam a ngai a, tun season ṭan tirh erawh ka thutlukna siam ve hun a ni. Chelsea chhuahsan mah ila Mourinho chunga ṭhat hi ka tih tur a ni. Ani nen hian hlawhtlinna tam tak kan chang a, kan inzah tawn em em a ni. Khawvel coach ṭha ber zinga mi a ni a, tunah chuan kan inhmachhawn tawh dawn a, kan inkar boruak erawh a chhiat phah lo ang," tiin a sawi.

Mourinho hnuaia a zir chhuah sawi zuiin Cech chuan, "Ani hneh aṭang hian thil tam tak a zir a. Ka zir chhuah pakhat chu thutlukna harsa tak kan siam dawn a nih chuan kan tih turah khan rinna zawng zawng kan nghat tur a ni," a ti.