Formula 1 intlansiak a hmuhnawm tawk lo em ni?

Grand Prix Drivers' Asso­ciation (GPDA)-in fan 217,756 a zirchianna an neih aṭangin 90% dawn chuan Formula 1 inelna hi a hmuhnawm tawk loin, team hrang hrangte tih takzetin an inel tawk loah an ngai.

July 26-a Monaco Grand Prix tlan zawh anih aṭang khan chawlhkar hnih chhungin ram hrang hrang 194-ah zirchianna hi neih a ni a, a lan dan chuan Ferrari driver Kimi Raikkonen chu mipui hriat lar ber a ni. Team zingah Ferrari bakah McLaren leh Williams te chu an lar bera ngaih a ni bawk.

Zirchianna neihna ram 194 aṭang hian England, France leh United States te chuan he thil hi an ngaipawimawhin an la thutak hle. Heng ram pathum hi fan tam berte rawn chhuahna a ni nghe nghe.

Mipui ngainat driver

Brazillian driver Ayrton Senna chu Formula 1 driver awm tawh ho zingah mipui ngainat leh duh ber nia ngaih a ni a, ani hian kum 1984-1994 chhung khan team hrang hrang Toleman, Lotus, McLaren leh Williams car a khalh ṭhin.

Motor intlansiaka kum 10 hun a hman chhungin ṭum thum chu World champion niin Grand Prix vawi 41-ah hnehna a chang. Kum 55-a upa driver chawl ta hi vawi 80 zet podium-ah a lawn a ni.

Zinchianna aṭanga a lan dan chuan German driver ropui chawl ta Michael Schumacher chu mipui ngainat leh lawm hlawh ber dawttu a ni a, a hnung chiahah hian Alain Prost a awm thung. Kum 46-a upa Schumacher hi ṭum sarih zet Formula 1 inelnaah hian a champion thei a ni.

Mi thar an awm lo?

Zirchianna aṭang hian Formula 1 fan-ah hian mithar an tam lo niin a lang. Fan 75% aia tam zawk chu kum 37 aia upa tawh niin kum 10 chuang zet he inelna lo en tawh vek an ni tih hriat a ni.

Tunlaia Formula 1 intlansiak entu tam ber chu kum 25 aṭanga kum 44 inkar vel an nih tlangpui avangin ṭhangthar ten he inelna hi tunhma angin an ngaihlu tawk ta lo niin a lang bawk.

Tuna a lan dan chuan hetiang zela he inelna hi a kal anih chuan nakin zelah chuan mipuiin an hlut lo tial tial dawn niin a lang. Chuvangin thuneitute chuan mipui hip thei tur leh miin an ngaihven thar theihna tur an ngaihtuah chhuah a hun ta hle niin a lang.

Fan-te kum upa lam deuh vek an nih vang leh an team leh driver ngainat ber berte aṭanga chhut chuan ṭhangthar zingah Formula 1 intlansiak en an tam tawk lo deuh niin a ngaih theih. Tun hnai kum hnih chhunga team che ṭha ber Mercedes an lang lo leh, dirver che ṭha ber pahnih Lewis Hamilton leh Sabastian Vettel te hming alang lo hian a ti chiang viau bawkin a ngaih theih.

Eng tin nge ni ang?

GPDA zir chianna aṭang hian fan 60% te chuan 'Refuelling' an duh. Kum 2009 aṭanga an tih tawp tak intlansiak laklawh laia car-a oil thun (Refuelling) hi team hrang hrangte inelna ṭhin a ni. Mahse kum 2010 aṭang khan he dan hi hman a ni tawh lo thung.

A chhan nia lang chu Kum 2010 aṭang khan Formula 1 car hi tih sei niin tunhma aiin 22cm-in a sei tawh zawk. Hevang hian intlansiak bul an ṭan tirha an oil thun sa bak chu an tlan laklawh laiin an thun belh tawh ngai lo a ni.

Mi tam zawkin tunhmaa an thil tih ṭhin dan chu hmuhnawm leh ṭha zawka an hriat avangin kum 2017 aṭang chuan he dan hi hman leh tumna a awm mek a, mahse thu tihchian a la ni lo thung.

Tuna car tyre an hman lai hi Italy rama motor ke siamtu lian Pirelli siam niin 13 inches a lian a ni. Kum 2017 aṭang chuan France company lian Michelin-in tyre supply tu nih an tum ve a, an supply thei a nih chuan tyre hman lai hi inches 18 a tihlen an duh thu an sawi bawk.

Zirchianna aṭanga 80% te chuan tyre siamtu hi pakhat chauh niloin inel tham awm se an duh avangin kum 2017 aṭang chuan car ke lian zawk kan hmu lo ang tih a sawi theih tawh loh.