Wimbledon Number 1 pahnih an chak nuamsa

Nilaini zan khan Wimbledon second round chu khelh chhun­zawm leh a ni a, mipa leh hmeichhe seeded pakhatnate chuan harsatna tawk loin third round an lut. Ru­ssian star Maria Sharapova chuan second round a paltlang bawk.

Centre court-a inkhelah mipa seeded pakhatna Novak Djokovic chuan darkar khat leh minute 31 chhungin Jarkko Nieminen chu straight set 6-4, 6-2, 6-3 in a hneh. Djokovic hian third round-ah seeded 27 na Australia mi Bernard Tomic a hmachhawn leh ang.

Khawlum tak hnuaia hnehna changtu Djokovic chuan, "Hnehna ka chang hi ka lawm hle. A round a san telh telh avangin ka inkhelh danah pawh tihsual ka neih tlem telh telh a ṭul ang. Nieminen-a kha player ṭha leh taima tak a ni a, he tournament-ah kan hmu tawh lo tur hi a pawi ka ti hle," tiin a sawi. Finnish tennis star kum 33-a upa Nieminen hian kumin bak chu Wimbledon khelh a tum tawh lo.

Mipa inkhel dangah French Open champion lai Stan Wawrinka chuan second round paltlang turin harsatna a tawk bik lo. A khingpui Victor Estrella Burgos chu 6-4, 6-4, 7-5 in a hneh. He inkhelah hian Wawrinka hian a service ṭhat a hmang ṭangkai hle a, vawi 15 zet ace a siam thei.

Nilaini zan khan mipa seeded pasarihna Milos Raonic chuan tun tournament-a ball vaw na ber record a siam. Tommy Haas hneh turin Raonic hian 146mph zet a na in a service a ni. He a service na tak mai hi Wimbledon khelh tawh zawng zawnga service na ber pathumna a ni nghe nghe.

Kum 2010 khan Taylor Dent chuan 148mph zeta nain a lo service tawh a, hei hi Wimbledon a service na ber record a ni. Pahnihna chu kum 2004-a Andy Roddick-a'n 146mph a naa a service kha a ni bawk.

Williams leh

Sharapova pawh chak

Hmeichhe seeded pakhatna Serena Williams chuan minute 59 chhung lekin Timea Babos chu 6-4, 6-1 in a hneh. Third round-ah Williams leh Heather Watson an inhmachhawn leh ang. British mipui ṭan rawn Watson hian fourth round thleng turin beiseina a nei tlem ta hle.

Kum 2004 champion Sharapova chuan khawlum tak hnuaiah 6-3, 6-1 in Richel Hogenkamp hneh­in third round-ah Irina-Camelia Begu a hma­chhawn leh ang.

Minute 65 chung leka a khingpui Dutch hnehtu Sharapova chuan, "Ka chenna Long Boat Key, Florida aiin boruak a lum zawk em avangin inkhelh a harsa hle. Practice naah nisa tak hnuaiah kan inkhelh tho avangin taksa a chau duh hle," tiin a sawi.

Kum dang zawng aiin kumin hian England-ah khua a lum deuh a, Nilaini zan pawh khan 41.2C vel lai a ni hial.