Gold Cup atan Hernandez dinhmun chiang lo
Nilaini zan friendly match-ah Mexico leh Honduras te goal awm loin an inhnehtawk a, minute 41-naah inhliam vangin Manchester United striker Javier Hernandez lak chhuah a ni.
NRG Stadium, Texas-ah Mexico forward Carlos Vela-a'n inkhel chanve hma lam leh hnu lamah goal ban a pet per a, Honduras tana Anthony Lozano goal khung tur chu Mexico keeper Guillermo Ochoa-a'n a dan sak bawk. Minute 90 chhungin goal a lut lo a, hun tawp hmain coach pahnih Jorge Luis Pinto leh Miguel Herrera te technical area-ah an inhnial a, boruak sang takin inkhel a tawp.
Kum 27-a upa Mexico forward Chicharito hian a dar ruh a ti na a, damdawi-inah kalpui nghal a ni. Inhliam vang hian United forward hi July 7 aṭanga ṭan tur 2015 CONCACAF Gold Cup khel turin a dinhmun a chiang lo.
Chicharito hian ram tan vawi 70 a khelh tawh aṭangin goal 40 a khung tawh a, Mexico tana goal khung tam ber Jared Borgetti (46) umpha turin goal sarih chiah a mamawh tawh.