Indian Super League Delhi Dynamos manager tur Roberto Carlos
Brazil leh Real Madrid player hlui Roberto Carlos-a'n marquee manager ni turin Indian Super League club Delhi Dynamos a zawm dawn.
Khawvela left back piang tawha ṭha ber zinga chhal ngam Carlos chungchang hi official-a puanzar la awm lo mah se India ram chanchinbu lar Times of India-in Delhi Dynamos a zawm ngei tur thu an tarlang. TOI hian an thuhriatna hi Dyanmos nena inhnimhnai tak niin an ziak lang tel bawk.
ISL season hmasa berah Dynamos hi Dutch coach Harm van Veldhoven hnuaiah pangana an ni a, marquee player-ah Italian player ropui Alessandro Del Piero an la lut a, Mizo player S. Malsawmtluanga leh Robert Lalthlamuana te an khel bawk.
Kum 42-a upa Carlos hi Qatar club Al-Arabi nen sawi zawm ni mah se June 2 khan club website chuan an inbiakna an tlawlh thu an ziak. Brazil legend hian Real Madrid a chhuahsan hnuah Fenerbahce, Corinthians leh Anzhi Makhachkala tan a khel a, kum 2012 khan football khelh a chawlh thu a puang.
Carlos hian Turkish club Sivasspor leh Akhisar Belediyespor a enkawl tawh a, club kaihhruai kawngah sulhnu nei lo tawp a ni lo.
Delhi Dynamos hian marquee player tur an zawk mek a, hming lam rik zingah Liverpool star hlui John Arne Riise leh Chelsea player hlui Florent Malouda te an tel. Dynamos hian season thar atan Hans Mulder leh Gustavo dos Santos te a chelh a, midfielder pahnih hian ISL season 1-ah khan goal riat an khung. July 31 khi ISL club tan marquee player puanna hun tawp a ni.
Season hnihna chu
2015 Indian Super League hi October 3 aṭanga khelh ṭan tur a ni a, Opening Ceremony hi Chennai-ah neih tur a ni. Match hmasa berah champion lai Atletico de Kolkata leh Chennaiyin FC te an inkhel ang.
ISL2 hunchhung hi ni kuaa pawhsei a ni a, kum hmasa lam ang bawkin match 61 a awm ang. MPL ang thoin league stage-ah match 56 a awm a, two legged semi-final awm lehin knockout round hi December 11-ah khelh tur niin December 20-ah final khelh a ni ang.