Jackson Martinez manah Atletico Madrid leh Porto inrem

Spanish club lian Atletico Madrid chuan FC Porto aṭanga Jackson Martinez la lut turin Portuguese club pawisa phut zat pound maktaduai 24.8 thehchhuah an remti a, club pahnih hi an indawr fel tawh.

Colombia striker Martinez hi Arsenal nen pawh sawi zawm an ni a, mahse Juventus laka an striker Mario Mandzukic chantu Atletico hian Porto phut zat pek an huam avangin Madrid khaw lam hi a pan dawn ta zawk a ni.

Kum 28-a upa Marti­nez hian kum 2012 khan Porto-a zawm a, league match vawi 90 a inlanah goal 67 khungin Primeira Liga-a season thum a khelh chhungin top scorer a ni fai vek a ni.

Colombia club lian Independiente Medellin-a a career bul ṭantu Martinez chuan Atletico Madrid a pan thei tur chu a lawmthu sawiin, "Club lian leh ropui tak ka pan thei tur hi ka phurin ka lawm takzet a ni," a ti.